Amerikanyň Boeing aerokosmiki korporasiýasy 2030-njy ýyla çenli 100% bio-ýangyçda uçup bilýän täjirçilik uçarlaryny ýola goýmaga taýýardygyny habar berdi. Bu kompaniýadan uçarlaryň hereketlendiriji ulgamlaryny kämilleşdirmegi we uçuşlarda bio-ýangyjyň ýüz göterim ulanylmagy üçin global awiasiýa düzgünleşdirijilerinden şahadatnama almagy talap eder diýip, kommersant.ru belleýär.
Boeing bu ugurda eýýäm birnäçe wagt bäri iş alyp barýar. 2018-nji ýylda ýüz göterim bio-ýangyjy ulanmak bilen ilkinji gatnaw amala aşyryldy.Bu Boeing 777 ýük uçarydy, synag uçuşy FedEx transport kompaniýasy tarapyndan geçirildi.
Umuman, hereket edýän düzgünlere laýyklykda, adaty uçuşlar üçin bio-ýangyjyň iň ýokary düzümi 50%, garyndynyň galan 50%-i adaty awiasiýa ýangyjy bolmaly.Awiasiýa üçin bio-ýangyç dürli çig maldan, şol sanda iýilmeýän ösümliklerden, oba hojalygy we tokaý galyndylaryndan, gaýtadan ulanylmaýan öý galyndylaryndan we senagat gaz zyňyndylaryndan öndürilip bilner diýip, Boeing belleýär.
ABŞ-nyň Energetika ministrliginiň maglumatlaryna görä, bio-ýangyjyň ulanylmagy atmosfera kömürturşy gazynyň zyňyndylaryny 80% azaltmaga mümkinçilik berer.