Şu gün ýurdumyzda Bilimler we talyp ýaşlar güni mynasybetli ýurdumyzyň ähli künjeginde baýramçylyk çäreleri geçirildi. Bilim ojaklarynda kakylan ilkinji jaňlar täze ― 2022–2023-nji okuw ýylynyň başlanýandygyny buşlady.
Ir säher bilen Garaşsyzlyk binasyna hem-de Ahal welaýatynyň Gökdepe etrabynyň Yzgant obasyndaky 27-nji orta mekdepdäki Berdimuhamet Annaýewiň ýadygärligine gül goýmak dabaralary geçirildi.Aşgabatda we welaýatlarda täze okuw-terbiýeçilik edaralarynyň açylmagy baýramçylygyň dabarasyny has-da artdyrdy.
Orta, ýörite orta hem-de ýokary okuw mekdeplerinde dabaraly nyzamlar guraldy.Mekdep durmuşyna ilkinji gezek gadam basýan 159 müň 772 okuwça hormatly Prezidentimiziň adyndan kompýuterler sowgat berildi.Okuw ýylynyň ilkinji Halkyň Arkadagly zamanasy ady bilen geçirildi.
2022-2023-nji täze okuw ýylynyň başlanmagy mynasybetli ýurdumyzda orta mekdepleriň 7-si, çagalar baglarynyň 5-si ulanmaga berildi.Täze okuw ýylynda Türkmenistan boýunça 1882 sany orta mekdepde 1 million 574 müň 737 okuwçy, raýat ugurly 20 sany ýokary okuw mekdebinde 65 müň 242, orta hünär okuw mekdepleriniň 42-sinde 26 müň 479 talyp bilim alar.
Mugallymçylyk ugurly orta hünär we ýokary okuw mekdeplerinde okuwlaryny tamamlan ýaşlaryň 3165-si Aşgabat şäheriniň hem-de welaýatlaryň bilim edaralaryna işe ýollanyldy. Şeýle-de diplomlary ykrar edilen pedagogik bilimli raýatlaryň 411-si bilim edaralaryna işe kabul edildi.
Umuman, täze okuw ýylynda ýurdumyzyň bilim-terbiýeçilik edaralarynda ýaşlaryň aň-bilim we beden taýdan kämilleşmekleri, döwrebap bilimlere eýe bolmaklary üçin ähli zerur şertler göz öňünde tutuldy.