Formula 1 boýunça möwsümiň 6-njy bäsleşigi Monakoda geçirildi.F1 ýaryşlarynyň seresi hasaplanýan Monako “Gran Prisinde” “Ferrari” topary goşa üstünlik gazandy.Monakonyň merkezi şäheri Monte Karlonyň köçelerinde geçirilen 78 aýlawlyk bäsleşigi 1 sagat 44 minut 44,340 sekuntda tamamlan Sebastian Wettel ýeňiji boldy.
Ol 39-njy aýlawda 1-nji hatardan bat alan topardaşy Kimi Raikkonenden öňe saýlanyp, pellehana çenli-de şol durkuny saklamagy başardy. Öňdäki orunlarda ýaryşa goşulmagyň ähmiýetiniň iň köp täsir edýän bäsleşiginde ýeňiş gazanan Wettel karýerasynda 45-nji gezek münberiň çür depesine çykdy. “Ferrari” topary 2001-nji ýyldan soň, Monako “Gran Prisinde” ilkinji ýeňşini baýram etdi.
Wettelden 3,1 sekunt yza galan Raikkonen 2-nji ýeri eýeledi. Şeýlelikde, “Ferrari” topary 90-njy gezek, 2010-njy ýyldaky Germaniýa “Gran Prisinden” soň, ilkinji gezek F1-de goşa üstünlik gazandy. 3-nji orna-da “Red Bulldan” awstraliýaly Daniel Rikkiardo mynasyp boldy.Bu ýaryşdan soň, utugyny 129-a ýetiren Sebastian Wettel Monako “Gran Prisini” 7-nji hatarda tamamlan Lewis Hamiltondan 25 utuk öňe saýlandy. 3-nji orunda 75 utukly Waltteri Bottas barýar.
Möwsümiň indiki ýaryşy 11-nji iýunda Kanadada geçiriler.