Şu ýyl AFK-nyň Çempionlar ligasyndaky çykyşyny geçen ýyldakydan güýçlendirmek isleýän Ahal futbol topary milli ýaryşlardaky iň güýçli garşydaşy Altyn asyryň hüjümçisi Altymyrat Annadurdyýew bilen düzümini güýçlendirdi.
Biz ozal Altymyradyň Altyn asyr bilen hoşlaşandygyny habar beripdik. Resmi bolmadyk maglumatlara görä, hüjümçi öňümizdäki möwsümde Ahalyň üstünlikleri üçin göreşer.
Altymyrat Annadurdyýew uly futbola Ahalda gelipdi. Häzir topara ýolbaşçylyk edýän Guwançmuhammet Öwekow ony uly futbola getiren ilkinji tälimçidir. Ahalda ýyldyzy parlan Altymyrat bir möwsümden soňra Altyn asyra geçdi.
Altymyrat Annadurdyýew häzirki wagtda AFK-nyň kubogynda iň kän pökgi geçiren türkmenistanly futbolçynyň rekordyny özünde saklaýar. 2023 ― 2024-nji ýyllaryň möwsüminde bolsa ol bu üstünligini yklymyň birinji derejeli klublaýyn ýaryşynda dowam etdirmäge synanyşar.