Oskaryň buşlukçysy hasaplanýan “Altyn globus” baýraklarynyň bu ýylky dalaşgärleri mälim edildi. 76-njy gezek gowşuryljak “Altyn globus” baýraklarynda iň gowy drama filmi ugrunda “Gara klanlar” (BlacKkKlansman), “Gara Pantera” (Black Panther), “Bohemian repsodi” (Bohemian Rhapsody), “Eger-de Bil Strit gürläp bilsedi” (If Beale Street Could Talk) hem-de “Ýyldyz dogýar” (A Star Is Born), iň gowy sazly ýa-da komediýa filmi ugrunda-da “Telbe, baý aziýalylar” (Crazy Rich Asians), “Söýgüli” (The Favourite), “Ýaşyl kitap” (Green Book), “Meri Poppins gaýdyp gelýär” (Mary Poppins Returns), “Wise-president” (Vice) kinolary dalaşgärlige hödürlendi.
Drama filmleriniň iň gowy aktýory baýragyna Bredli Kuper (A Star Is Born), Willem Dafo (At Eternity’s Gate), Lukas Hejes (Boy Erased), Rami Malek (Bohemian Rhapsody), Jon Dewid Waşington (BlacKkKlansman), iň gowy aktrisa baýragyna-da Glenn Klouz (The Wife), Leýdi Gaga (A Star Is Born), Nikol Kidman (Destroyer), Melissa Makkarti (Can You Ever Forgive Me?) hem-de Rozamund Paýk (A Private War) dalaşgär görkezildi.
Sazly ýa-da komediýa filmleriniň iň gowy aktýory ugrunda Kristian Beýl (Vice), Lin-Manuel Miranda (Mary Poppins Returns), Wiggo Mortensen (Green Book), Robert Redford (The Old Man & the Gun), Jon Si Reilli (Stan & Olie), iň gowy aktrisasy ugrunda-da Emili Blant (Mary Poppins Returns), Oliwia Kolman (The Favourite), Elsi Fişer (Eighth Grade), Şarliz Teron (Tully) hem-de Kostans Wu (Crazy Rich Asians) dagy özara bäsleşer.
Iň gowy režissýor baýragyny-da Bredli Kuper (A Star Is Born), Alfonso Kuaron (Roma), Piter Farrelli (Green Book), Spaýk Li (BlacKkKlansman), Adam MakKaý (Vice) dagydan haýsy hem bolsa biri alar.
Başga-da birnäçe ugurlarda, şol birwagtyň özünde-de teleseriallaryň arasynda-da dürli ugurlaryň dalaşgärleri mälim edildi.Golliwuddaky daşary ýurtly žurnalistler tarapyndan 1947-nji ýyldan bäri berilýän 76-njy “Altyn globus” baýragynyň heýkeljikleri öz mynasyplaryna 2019-njy ýylyň 6-njy ýanwarynda Bewerli Hillsde geçiriljek dabarada gowşurylar.