21-nji maýda, ýagny Aşgabat şäheriniň gününiň öňüsyrasynda Türkmen döwlet binagärlik-gurluşyk instituty baýramçylyk mynasybetli Ak şäher Aşgabat binagärlik sungatynyň dürdänesi, ylmy-innowasiýalaryň mekany atly halkara ylmy-amaly maslahat geçirer.
Türkmen döwlet binagärlik-gurluşyk instituty alymlary, mugallymlary, aspirantlary, ýurdumyzdaky ýokary okuw mekdepleriň talyplaryny, ylmy-barlag edaralarynyň işgärlerini, inženerleri we ýurdumyzdaky we daşary ýurtdaky ylmy-tehniki bileleşik hünärmenlerini gatnaşmaga çagyrýar.
Ylmy-amaly forum onlaýn görnüşde türkmen, rus we iňlis dillerinde geçirilýär.Maslahaty dört sany esasy ugruň çäginde geçirmek meýilleşdirilýär: Binagärlik we gurluşyk innowasiýalary, döwrebap materiallar we ösen tehnologiýalar; Binagärlik, dizaýn, şähergurluşyk we ilatly ýerleriň meýilleşdirilişi; Sanly tehnologiýalaryň gurluşykda we binagärlikde ornaşdyrylmagy, gurluşygyň ykdysadyýeti; Gurluşykda ekologiýa, durmuş howpsuzlygy we alternatiw energiýa çeşmeleri.
Halkara ylmy-amaly maslahata gatnaşmak isleýänler guramaçylyk komitetine 15-nji maýa çenli hasaba alyş sowalnamasyny, şeýle-de tsaci.conferens@gmail.com; ylym.tdbgii@gmail.com elektron poçta boýunça taýyn görnüşde tezis we annotasiýa ugratmaly. Çäre hakynda giňişleýin maglumatlar institutyň saýtynda ýerleşdirilendir we (+99365) 02-97-86; (+99365) 50-67-58; (+99312) 28-18-03; (+99312) 28-18-04 telefon belgileri arkaly elýeterdir.
Bu maslahatyň esasy maksady özara bähbitli ylmy maglumatlaryň we gatnaşyjylaryň arasyndaky tejribe alyş-çalşygy, dostlukly gatnaşyklaryň we halkara ylym-bilim hyzmatdaşlygynyň berkemegi bolup durýar.