2023-nji ýylyň 3-nji iýunynda Bütindünýä welosiped güni mynasybetli Aşgabatda giňden ýaýbaňlandyrylan sport çäreleri bilen birlikde köpçülikleýin welosiped ýörişi geçiriler.
Bu ýörişe paýtagtyň Bekrewe we Çandibil köçesiniň aýlawçasyndaky Welosiped binasyndan gündogarlygyna badalga berlip, Çandibil we Bitarap Türkmenistan şaýolunyň kesişmesindäki aýlawçadan demirgazyklygyna, Bitarap Türkmenistan şaýolunyň ugry bilen Galkynyş köçesine çenli aralykda bolar. Şoňa laýyklykda, günüň birinji ýarymynda ulaglaryň hereketiniň çäklendirilýändigi ýatladylýar.
Turkmenportala berlen habara görä, hereketi Arçabil, Garaşsyzlyk, Türkmenbaşy şaýollarynyň üsti bilen dowam etmeklik maslahat berilýär.
Hormatly sürüjiler! Awtoulaglaryňyzy ýol ýakalarda goýmaklygyň, her bir herekete gatnaşyja düýpli päsgelçilik döredýändigini ýatda saklaň, barýan ugruňyzy öňünden kesgitlemegi unutmaň! diýlip, habarda bellenilýär.