21-22-nji martda Milli bahar baýramynyň Halkara Nowruz gününiň dabaralary ýurdumyzyň ähli künjeklerini gurşap aldy. Pähim-paýhas ummany Magtymguly Pyragy ýylynda mukaddes Remezan aýyna gabat gelen rysgal-berekediň, ynsanperwerligiň, jebisligiň ajaýyp baýramçylygy mynasybetli Arkadag şäherinde hem-de welaýatlarda guralan dabaralar milli öwüşginlere, many-mazmunly çykyşlara baý boldy.
Aýratynlykda belläp geçsek, tebigatyň täzeleniş toýy mynasybetli Arkadag şäheriniň baýramçylyk meýdançasyndaky Nowruz ýaýlasynda, Arkadag Binasynyň öňünde, Änew şäherindäki Bagt ýyldyzy, Tejen etrabyndaky Arzuw toý mekanlarynda, Gökdepe etrabynyň Babarap obasyndaky toý mekanynda, Kaka etrabynyň medeniýet öýünde, Ak bugdaý etrabynyň çägindäki Nowruz ýaýlasynda, Balkanabat şäherindäki Türkmeniň ak öýi binasynyň öňündäki meýdançada, Daşoguz welaýatynyň Türkmeniň ak öýi binasynyň giň meýdançasynda, welaýat merkeziniň Magtymguly meýdançasynda, medeni-dynç alyş seýilgählerinde, Türkmenabat şäherindäki Türkmeniň ak öýi binasynda, Mary welaýatynyň Türkmeniň ak öýi binasynyň öňündäki meýdançada, Tagtabazar etrabynyň çägindäki Pendi ýaýlasynda geçirilen baýramçylyk dabaralary ýüreklere ajaýyp öwüşgin çaýdy.