Ýakynda Türkmenistanyň Jemgyýetçilik guramalarynyň merkezi binasynda Behişdi bedewler türkmen halkynyň buýsanjy we şöhraty atly döredijilik bäsleşiginiň jemi jemlendi.Ol Türkmen bedewiniň milli baýramy mynasybetli Türkmenistanyň Magtymguly adyndaky Ýaşlar guramasynyň Merkezi geňeşi we Нейтральный Туркменистан gazetiniň redaksiýasy tarapyndan yglan edildi.
Bäsleşigiň esasy şertleri Gahryman Arkadagymyzyň başlangyçlary bilen dabaralanýan döredijilikli syýasatyň belent ýörelgelerini çeper sözüň güýji arkaly wagyz etmekden, türkmen bedewiniň belent mertebesini açyp görkezmekden, hormatly Prezidentimiziň beýik tutumlaryny dabaralandyrmakdan ybaratdyr.
Oňa gatnaşanlar özleriniň çeperçilik ussatlaryny goşgularyň, oçerkleriň, makalalaryň üsti bilen açyp görkezdiler.Netijede, baş baýraga Mary şäherindäki Hydyr Derýaýew adyndaky Mugallymçylyk mekdebiniň müdiri Maral Annagulyýewa, 1-nji orna Aşgabat şäherindäki Ruhnama adyndaky takyk ugurly derslere ýöriteleşdirilen 28-nji orta mekdebiniň mugallymy Göwher Ýakubowa, 2-nji orna Нейтральный Туркменистан gazetiniň habarçysy Şemşat Durdyýewa we Türkmenistanyň Döwlet habarlar agentliginiň habarçylar bölüminiň müdiri Gylyçmyrat Gurbanow, 3-nji orna Myrat Garryýew adyndaky Türkmenistanyň Döwlet lukmançylyk uniwersitetiniň mugallymy Läle Berdiýewa, Magtymguly adyndaky Türkmen döwlet uniwersitetiniň uly mugallymy Täçmuhammet Sahydow hem-de Magtymguly adyndaky Türkmen döwlet uniwersitetiniň uly mugallymy Ogulmaral Atajanowa dagy mynasyp boldular. Ýeňijilere Hormat hatlary we gymmat bahaly sowgatlar gowşuryldy.
Dabaranyň dowamynda çykyş edenler ýurdumyzda her ýylyň aprel aýynyň soňky ýekşenbesi Türkmen bedewiniň milli baýramynyň dabaraly ýagdaýda geçirilýändigini, atşynaslara ýaşaýyş jaýlarynyň berilmegini, şeýle-de Türkmenistanyň at gazanan atşynasy, Türkmenistanyň ussat halypa çapyksuwary, Türkmenistanyň halk atşynasy ýaly hormatly atlaryň dakylýandygyny, Galkynyş milli at üstündäki oýunlar toparynyň belent üstünliklerini, behişdi bedewlere belent sarpanyň goýulýandygyny buýsanç bilen beýan etdiler.