“Awaza” Milli syýahatçylyk zolagynda “Türkmenistanyň gurluşyk, senagat, energetika pudaklarynyň ösüşi” (CIET 2025) halkara maslahaty we sergisi dünýä ykdysadyýetiniň iň ösen we innowasion ugurlarynda işleýän kompaniýalaryň ünsüni özüne çekýär.
Bu ýylda ilkinji gezek gatnaşanlaryň arasynda blokçeýn tehnologiýalary hem-de ýokary öndürijilikli sanly hasaplamalar boýunça dünýäniň öňdebaryjy kompaniýalarynyň biri “Bitdeer Technologies Group” hem bar. Maslahatda kompaniýanyň hyzmatdaşlyk we işewürligi ösdürmek boýunça direktory Husame Naimi çykyş etdi.
“Bitdeer” kompaniýasynyň CIET 2025 maslahatyna gatnaşmagynyň maksady energetika we senagat pudaklarynyň netijeliligini ýokarlandyrmak üçin öňdebaryjy sanly çözgütleri ulanmagyň mümkinçiliklerini Türkmenistana hödürlemekdir.
Arassa energiýa we durnukly ösüşe bagyşlanan maslahatyň çäklerinde “Bitdeer” kompaniýasy Türkmenistanda ýokary tehnologiýaly maglumat merkezleri döretmek mümkinçiliklerini öwrenmäge gyzyklanma bildirdi. Kompaniýa ýurduň energetika mümkinçilikleriniň şeýle sanly taslamalar üçin amatlydygyny belleýär.
Husame Naimi çykyşynyň dowamynda iri energiýa kuwwatlaryny netijeli dolandyrmak, sanly gurallary ulanmak arkaly energiýa sarp edilişini optimizirlemek boýunça halkara tejribelerini paýlaşdy.
“Bitdeer” kompaniýasynyň ilkinji gezek Türkmenistanda şeýle ýokary derejedäki çärä gatnaşmagy Türkmenistan üçin aýratyn ähmiýetlidir. "Bitdeer" kompaniýasy bilen hyzmatdaşlyk diňe gurluşyk we senagat ýaly adaty ugurlarda däl, eýsem sanly ykdysadyýet hem-de ýokary tehnologiýaly hyzmatlar ulgamyny ösdürmek arkaly ýurduň ykdysadyýetini diwersifikasiýalaşdyrmaga mümkinçilik berer.
Türkmenistanda iri maglumat merkezleriň döredilmegi, ýurduň bar bolan artykmaç energetika mümkinçiliklerini netijeli peýdalanmagyň bir usuly bolup biler. Bu bolsa ýokary girdejili täze sanly senagaty döretmäge giň mümkinçilik açar.
Husame Naiminiň çärä gatnaşmagy özüni "akylly" gurluşygyň we arassa energetikanyň sebit merkezi hökmünde tanadýan Türkmenistana maýa goýmak üçin dünýä tehnologik işewürliginiň gyzyklanmasynyň artýandygyny tassyklaýar.