Paýtagtymyzyň Watan kinokonsert merkeziniň zalynda Çagalary goramagyň halkara güni mynasybetli Çagalarymyz internetde atly konsert üstünlikli geçirildi.Zal dürli ýaşdaky tomaşaçylardan doludy.Sahnada bolsa birnäçe döredijilik toparlarynyň gyzlary we oglanlary çykyş etdiler.
Olar üçin bellenen egin-eşik päkligiň nyşany hökmünde ak lybas boldy.Konsertde Melodiýa orkestriniň sazandalary çykyşlara sazly goldaw berdiler.Orkestre halkara bäsleşikleriniň ýeňijisi Annaoraz Döwletow ýolbaşçylyk etdi.
Konsertiň alyp baryjysy Ýekaterina Darçiýa sahnadan çykyş edip, Türkmenistandaky medeniýet we sungat işgärleriniň adyndan milli döredijiligi ösdürmäge berýän yzygiderli goldawy üçin hormatly Prezidentimiz Serdar Berdimuhamedowa çuňňur hoşallyk bildirdi.Konsert maksatnamasy Habarnamalar tansy atly tans kompozisiýasy bilen açyldy.
Gatnaşyjylar ellerinde smartfonlary saklap, elektron enjamlaryň mümkinçiliklerini şekillendirýän çalt we kesik tans hereketleri ýerine ýetirdiler. Çagalarymyz internetde temasyny açyp görkezýän Kompýuter, Kömekçi, Georgiý Wasilýewiň Internet, Ýuriý Entiniň Ösüş nähili öňe gitdi!, şeýle hem Fiksikler taslamasynyň Zombi smartfonlary atly aýdymlary ýerine ýetirildi. Şol bir wagtyň özünde internet temasy bilen baglanyşykly aýdymlar bilen birlikde çagalaryň söýgüli aýdymlary hem ýaňlandy. Ýekaterina Darçiýanyň täzeçe sözler bilen taýýarlan Çunga-Çanga aýdymy, Aýna Şirowanyň Tüýdük atly instrumental eseri, Bremen sazandalary filminden aýdym, Saýrak bilbiller horunyň ýerine ýetiren Mamontjagazyň aýdymy, Wladimir Şainskiniň Buratino, Röwşen Nepesowyň Watanym we Aleksandr Žurbiniň Çagalyk planetasy atly aýdymlary tomaşaçylara hödürlenildi.
Bu aýdymlaryň saýlanyp alynmagy tötänden däldi, sebäbi internetiň giňden ýaýramagyna garamazdan, bagtyýar çagalyk gymmatlygyny hiç zat üýtgedip bilmez.Maksatnamanyň iň täsirli çykyşlarynyň biri Sunža lezginka mekdebiniň okuwçylarynyň çykyşy boldy.
Toparyň ýolbaşçysy Allaberdi Ataýewiň ýolbaşçylygyndaky ýaş tansçylar meşhur Lezginka tansyny örän çalt depginde we uly joşgun bilen ýerine ýetirip, öz duýgularynyň bir bölegini tomaşaçylara hem ýetirdiler.Muňa jogap hökmünde tomaşaçylar zehinli tansçylary Berekella!
diýen şygarlary bilen gutladylar.Konsert Andreý Aleksiniň Goý söýgi dünýäni dolandyrsyn!atly aýdymy bilen jemlendi.Aýdymyň mazmuny Ýer ýüzündäki adamlaryň aglabasynyň arzuwyny beýan etdi: Goý, häzirki zaman tehnologiýalaryny oňat özleşdiren çagalarymyz, olaryň çagalary we agtyklary parahat asmanyň astynda ýaşasynlar hem-de ösüş adamzada diňe şatlyk getirsin!