Şu gün 11-nji dekabrda paýtagtymyzdaky “Ýyldyz” myhmanhanasynda Halkara Bitaraplyk gününe bagyşlanyp, “Dialog-parahatçylygyň kepili” atly halkara maslahat geçirildi.Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň başlyklyk etmeginde geçirilen halkara maslahatyna BMG-niň Baş sekretarynyň orunbasary, Ýewropa Ykdysady we durmuş komissiýasynyň ýerine ýetiriji sekretary Olga Algareýewa, Türki Döwletleriň Guramasynyň Baş sekretary Kubanyçbek Ömüraliýew, Merkezi Aziýa döwletleriniň daşary işler ministrleriniň orunbasarlary, Azerbaýjan Respublikasynyň daşary işler ministriniň orunbasary Halaf Halafow, Özbegistan Respublikasynyň Oliý Majlisiniň Senatynyň Başlygy Tanzila Narbaýewa, Gazagystan Respublikasynyň Parlamentiniň Mažlisiniň Başlygynyň orunbasary Balaýim Kesebaýewa, Gyrgyz Respublikasynyň Ýokary Geňeşiniň Başlygynyň orunbasary Jamiliýa Isaýewa, Täjigistan Respublikasynyň Hökümetiniň ýanyndaky Zenanlaryň we maşgala işleri boýunça Komitetiň başlygy Hilolbi Kurbonzoda we BMG-niň Aşgabatdaky wekilhanalarynyň ýolbaşçylary, şol sanda halkara we sebit guramalaryň wekilhanalarynyň wekilleri gatnaşdylar.
Halkara maslahatda BMG-niň Baş sekretary Antonio Guterreşiň, Bütündünýä Saglygy Goraýyş Guramasynyň Baş direktory Tedros Adhan Gebreýesusyň, Halkara migrasiýa guramasynyň baş direktory Antoniu Witorinonyň, ÝHHG-niň baş sekretary Helga Şmidiň iberen gutlaglary okaldy.
BMG-niň Baş sekretary Antonio Guterriş öz gutlag hatynda Türkmenistanyň dünýä jemgyýetçiligindäki ornunyň ýokarydygyny belläp, mundan beýläk-de netijeli we konstruktiw hyzmatdaşlygy amala aşyrmaga gyzyklanma bildirýändiklerini belledi.
Halkara maslahatda edilen çykyşlarda türkmen Bitaraplygynyň dünýäde parahatçylygyň üpjün edilmegindäki orny, şeýle hem Türkmenistanyň halkara möçberindäki başlangyjynyň “Dialog -parahatçylygyň kepili” atly täze global başlangyjynyň döwrüň möhüm talaby bolup durýandygyny belläp geçdiler.