Kataryň paýtagty Dohada geçirilen ýeňil atletika boýunça 17-nji Dünýä çempionatynda amerikaly türgenler öňe saýlandy.Olar 49 altyn medalyň 14-sini alyp, medal sanawynda öňdäki orny eýeledi.
Galyberse-de amerikaly ýeňil atletikaçylar 11 kümüş, 4 bürünç medal hem gazandylar. 5 altyn, 2 kümüş we 4 bürünç medal gazanan Keniýanyň ýeňil atletikaçylary 2-nji orna mynasyp boldular.
Sanawda 3-nji ýeri ýamaýkaly türgenler eýeläp, olar 3 altyn, 5 kümüş hem-de 4 bürünç medal bilen öz watanlaryna dolandylar.Hytaýdan baran türgenler medal görnüşleriniň üçüsindenem 3 medal gazanyp, 4-nji basgançakda orun tapdy.
Mahlasy, 20 ýurduň türgeni azyndan 1 altyn, 43 döwletiň ýeňil atletikaçysy-da azyndan 1 medal gazandy.Erkekleriň arasyndaky bäsleşiklerde marafon ylgawynda altyn medala efiopiýaly Lesisa Desisa mynasyp boldy.
Estafeta ýaryşlarynyň ikisinde-de 4×100 we 4×400 metr ylgawlarda amerikaly türgenlere taý tapylmady.Gülle iteklemekde amerikaly Jou Kowaç 22,91 metrlik görkeziji bilen çempionatyň rekordyny täzeledi.
Grenadaly Anderson Peters naýzany 86,89 metre zyňyp, ýurduna Dünýä çempionatlaryndaky 2-nji altyn medalyny gazandyrdy.Beýikligine bökmekde ýer eýesi, katarly Mutaz Essa Barşim Londondan soň, Dohada hem münberiň iň ýokary basgançagyna çykdy.Zenanlaryň arasynda Niderlandlaryň türgeni Sifan Hassan 10000 metrden soň, 1500 metr ylgawda-da çempionatyň rekordyny täzeläp, altyn medal gazanmagy başardy. Çempionatyň rekordy 5000 metre ylgamakda-da täzelenip, keniýaly Hellen Obiri 14 minut 26,72 sekuntda pellehana geldi.Päsgelçilikli 400 metrde amerikaly Dalilah Muhammed iýul aýynda goýan öz rekordyny 52,16 sekunda ýetirip, ýene bir ýola täzelemegi başardy. Üçürdikläp bökmekde 2 ýyl ozalky ýaly, ýene-de Ýulimar Rohas öňe saýlandy. 4×100 metr ylgawda Ýamaýkanyň ýygyndysy 4-nji altyn medalyna mynasyp boldy.
Olar 2009-njy, 2013-nji, 2015-nji ýyllarda-da çempionlyk gazanypdy.Toparyň agzasy, Dohada 2 altyn medal gazanan ýamaýkaly Şelli-Ann Freýser-Praýsyň altyn medallarynyň sany 9-a ýetdi.Garyşyk 4×400 metr estafeta ylgawynda gazanan altyn medaly bilen Usain Boltdan öňe geçen amerikaly atletikaçy zenan Allison Feliks 4×400 metr ýaryşynda-da ýeňiş gazandy. Şunlukda 13-nji altyn medalyny boýnuna dakan Feliks öz rekordyny täzeledi.
Ol häzirki wagtda 13 altyn, umumylykda-da 18 medal bilen Dünýä çempionatlarynyň iň köp altyn medal hem-de iň köp medal gazanan türgenidir.Ýeňil atletika boýunça nobatdaky Dünýä çempionaty 2021-nji ýylda ABŞ-nyň Ýujin şäherinde geçiriler.