Pars Today Yslam ynkylabynyň ýeňşiniň 47 ýyllygy mynasybetli Eýranyň dürli şäherlerinde halk köpçülikleýin ýöriş geçirip, bu taryhy güni dabaraly ýagdaýda belledi.
Eýranda 22-nji Bahman ýörişiniň başlanmagy bilen ýurduň 1400-den gowrak nokadynda halkyň ruhubelent we jebis ýagdaýda gatnaşmagy milli agzybirligiň we ynkylap maksatlaryna hem-de şehitleriň ýoluna ygrarlylygyň aýdyň nyşany boldy. Eýranyň demirgazygyndan günortasyna, gündogaryndan günbataryna çenli dürli ýaşdaky we dürli jemgyýetçilik gatlaklaryna degişli raýatlar gyşyň sowuk howasyna garamazdan, ýurduň baýdaklaryny buýsanç bilen ýokary galdyrdylar.
Eýranyň zenanlarynyň hem 22-nji Bahman ýörişine işjeň gatnaşmagy aýratyn üns çekdi. Zenanlar milli baýdaklary göterip, ýurduň ösüşine we ynkylap gymmatlyklaryna bolan ygrarlylygyny görkezdi. Bu ýagdaý jemgyýetde zenanlaryň ornuň we işjeňliginiň möhüm ähmiýete eýedigini görkezýär.
Şu ýylky baýramçylyk çäreleri Yslam ynkylabynyň ýolbaşçysynyň ýüzlenmesinden soň has-da ruhubelent ýagdaýda geçirildi. Çykyşda 22-nji Bahman gününiň milletiň güýjüni we jebisligini görkezýän aýratyn gün bolup durýandygy nygtaldy. Şeýle hem, ýurduň duşmanlarynyň agzybirligi bozmak synanyşyklaryna garamazdan, halkyň giň gerimli gatnaşmagy olaryň maksatlarynyň başa barmandygyny görkezýär diýlip bellenildi.
Ýörişe gatnaşanlar bellenilen ugurlar boýunça hereket edip, watanlaryna bolan söýgüsini, ynanjyny we Yslam ynkylabynyň maksatlaryna wepalylygyny beýan etdiler. Şeýlelikde, 22-nji Bahman ýörişi diňe bir baýramçylyk çäresi bolman, eýsem milli bitewilik, jebislik we döwlet garaşsyzlygyny goramak ugrundaky umumymilli pozisiýanyň beýany hökmünde çykyş etdi.