Geçen hepdede Filippinleriň kenarýakasynda gark bolan tankerden dökülen nebit ýurduň ştatlarynyň birnäçesiniň kenarýakalaryny eýeledi. Internetde ýerleşdirilen wideolarda ýerli ýaşaýjylaryň kenarda nebitönümlerini elleri bilen ýygnaýandygy görünýär diýip, Habar 24 ýazýar.
Nebit daşaýjy Princess Empress tankeri hereketlendirijisiniň näsazlygy sebäpli 2-nji martda Filippinleriň kenarýakasynda suwa gark boldy. Şonda açyk deňze senagat maksatly nebitönümleriniň 800 müň litri döküldi. Ýerli häkimiýetleriň bahalandyrmalaryna görä, dörän ýagdaý deňziň 40 kilometrlik kenarýakasyna howp salýar.