Gazagystanyň, Azerbaýjanyň we Gruziýanyň demir ýol edaralarynyň wekilleri Tbilisi şäherinde geçen “Silk Road” halkara maslahatynyň çäklerinde penşenbe güni paýnamalaryň deň bölünmesi esasynda bilelikdäki kärhanany döretmek hakynda ylalaşyk baglaşdylar. Üç ýurduň birleşen bu tagallalary Transhazar halkara ulag geçelgesiniň multimodal hyzmatlarynyň ösdürilmegine gönükdirilendir.
“Kazakstan temir žoly” kompaniýasynyň metbugat gullugynyň berýän maglumatlaryna görä, “Middle Corridor Multimodal Ltd.” adyny alan täze üçtaraplaýyn kompaniýanyň dolandyryş edarasy “Astana” Halkara maliýe merkezinde ýerleşer.
Bilelikdäki işleriň çäklerinde, täze döredilen kompaniýa “Bir penjire” ýörelgesi boýunça hyzmatlary hödürläp, Hytaý Ýewropa/Türkiýe Hytaý ugry boýunça ýükleriň öz wagtynda eltilmegini we multimodal hyzmatlary ösdürmek boýunça ylalaşylan syýasatyň durmuşa geçirilmegini üpjün eder.
Transhazar halkara ulag geçelgesi Hytaýyň, Gazagystanyň, Hazar deňziniň suwlarynyň, Azerbaýjanyň we Gruziýanyň üsti bilen Ýewropa hem-de Aziýa ýurtlaryny özara baglanyşdyrýar. Bu ulag ugry demir we deňiz ýollary arkaly konteýner ýükleriniň daşalmagynda peýdalanylýar.