Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň parasatly ýolbaşçylygynda mähriban watanymyzda jemgyýetçilik rowaçlygynda adam zähmeti arkaly döredilýän we hakykaty çeper keşplerde açyp görkezýän milli medeni baýlyklary, maddy we ruhy gymmatlyklary, ylmy, edebi we sungat eserleri babatda seýrek duş gelýän nusgalary, golýazmalary halkara ölçeglerine laýyklykda neşir we terjime etmekde, neşirýat önümçiligini, kitaphana işlerini toplumlaýyn döwrebaplaşdyrmakda, türkmen halkynyň medeni mirasynyň ähli görnüşleriniň öwrenilmegi, gaýtadan dikeldilmegi, aýawly saklanmagy, ösdürilmegi, ýaýradylmagy we peýdalanylmagy çygrynda amatly, abadan, sagdyn, durnukly, kämil şertleri döretmekde uly işler durmuşa geçirilýär.
Sungatyň taryhynda kitap medeniýeti durmuşyň ýüzi, döwürleriň güýji, milletiň mertebesi, ahlagyň altyny, ýalňyzlygy ýeňiji hemdemlik, şowlulyga tarap hyjuwly ymtylyş, pikirleriň lezzetli, kuwwatly, nepis söhbeti hasap edilýär.Zeminde mähriban halkymyz kitapsöýüji we kitaby köp okaýan milletleriň biri hökmünde tanalýar.
Türkmen halky uzak asyrlaryň dowamynda kitaplar dünýäsini akylyň zynaty, ylymlaryň sahawat hazynasy, maşgalanyň wepaly dosty, täzeçil çözgütleriň we açyşlaryň sakasy, rahatlygyň goragçylary, hakykatyň zerewşan monjuklary hem-de gözelligiň nakgaşçylary hasaplap gelipdir.
Geçmişde halkymyz kitaby paýhas dürdäneleriniň tylla köşgine, ynsanlary bolsa onuň sakçylaryna, tümlükleri böwüsýän yşkyň hallaryna meňzedipdirler.Irki orta asyrlarda pars dili şygryýetiň, arap dili ylmyň, oguz dili durmuşyň dili hökmünde meşhurlyk gazanypdyr.
Oguz zybanynda müňlerçe ýyllaryň dowamynda kitaphon halkymyz tarapyndan kätipçilik, hatdatçylyk we kitap hünärmentçiliginiň ýüzlerçe diwanlar, nemunalar we gymmatly eserleri döredilipdir. Şöhrata beslenýän Pähim-paýhas ummany Magtymguly Pyragy ýylymyzyň her bir güni, aýy, täze taryhy pursatlary belent döredijilikli maddy we ruhy gymmatlyklaryň tapgyrlaryny dowamly buşlaýar.
Medeni durmuşymyzdaky täzelikleriň iň görnüklileriniň hatarynda Arkadagly Gahryman Serdarymyzyň Änew-müňýyllyklardan gözbaş alýan medeniýet atly kitabynyň neşir edilmegini buýsanç bilen agzamak bolar.Hormatly Prezidentimiziň jöwher paýhasyndan, ýiti zehininden we ötgür galamyndan kemal tapan kitabyň Gadymy Änewiň täsinligi, Taryhy birleşdirýän uly wakalar atly baplarynda Änew medeniýetiň ýaşy, ýaşaýyş gatlaklary, taryhy ýadygärlikleriniň düzümi, çäkleri, ýerleşýän menzilleri, ölçegleri, Beýik ýüpek ýolunyň ugrundaky orny, arheologik, önümçilik häsiýetleri, arhitektura gurluşy, toplanylan gadymy binagärçilik tejribeleri, haşamly bezegleri, toponimik atlandyrylyşynyň mazmunlary, terbiýeçilik ähmiýeti hem-de alymlar tarapyndan öwrenilişi barada düýpli ylmy, özüneçekiji maglumatlaryň beýan edilmegi köňül guşuňy ganatlandyrýar.
Gysga wagtyň içinde müňlerçe okyjylaryň gyzgyn söýgüsini gazanyp uly meşhurlyga öwrülen kitapda mukaddes türkmen topragynda dörän medeniýetleriň sazlaşygy, gadymylygy, jemgyýetçilik bitewiligi, taryhy ösüşleri, dil, etnografik, folklor miraslary, iş saparlary bilen baglanyşdyrylýan täze hakykatlaryň, ylmy subutnamalaryň, şahyrana söz düzümleriniň, foto, arhiw resminamalarynyň orun almagy watançylyk duýgularyň kämilleşmegine täze badalgalary berýär.
Etrabymyzyň 90-na golaý pudaklaýyn dolandyryş düzümlerinde we Türkmenistanyň Kärdeşler arkalaşyklarynyň Görogly etrap birleşmesiniň ilkinji guramalarynda meýilnamalaýyn geçirilen ählihalk söýgüsini gazanan kitabyň tanyşdyrylyş dabaralary has-da täsirli, gyzykly boldy.
Döwlet syýasatynyň medeniýet babatdaky ýörelgelerini kämilleşdirmekde, milli gymmatlyklaryň raýatlar üçin erkin, elýeterli bolmagyny üpjün etmekde, kitap sungatyny, kitaphana hyzmatlaryny, çeper halk döredijiligini, ýadygärliklerini, hünärlerini, bilimlerini we senetçiligini döwrebaplaşdyrmakda atalyk aladalaryny edýän türkmen halkynyň Milli Lideri Gahryman Arkadagymyzyň hormatly Prezidentimiz Arkadagly Gahryman Serdarymyzyň döwletli işleriniň rowaç, janlarynyň sag, mertebeleriniň belent bolmagyny arzuw edýäris!