ABŞ-nyň Anahaým şäherinde geçirilýän agyr atletika boýunça dünýä çempionatynda ildeşimiz Kristina Şermetowa kümüş medala mynasyp boldy. 53 kilogram agramda çykyş eden Şermetowa umumylykda 204 kilogramlyk ştangany göterip, 2-nji orny eýeledi. 24 ýaşly türgen itekläp götermekde 91, silterläp götermekde-de 113 kilogramy ýokary galdyrmagy başardy.
Bu agram derejesinde tailandly Olimpiýa çempiony Sopita Tanasan 210 kilogram göterip (96+114) altyn medal gazandy. “Aşgabat 2017”-de ondan öňem Rio 2016-da kümüş medal alan filippinli Hidilin Diaz 3-nji orna mynasyp boldy. Ýokary depginde dowam edýän dünýä çempionatyna biziň ýurdumyzdan 5 türgen — Ýulduz Jumabaýewa (48 kg), Kristina Şermetowa (53 kg), Rejepbaý Rejepow (77 kg), Daýanç Aşyrow (85 kg) hem-de “Aşgabat 2017”-niň wise-çempiony Hojamuhammet Toýçyýew (105+ kg) gatnaşýar.
Bu halkara ýaryşda 68 döwletden 328 türgen çykyş edýär. 28-nji noýabrda başlan çempionat 5-nji dekabrda tamamlanar.Halkara agyr atletika federasiýasy 1905-nji ýylda döredildi.Merkezi edara binasy Wengriýanyň paýtagty Budapeştde ýerleşýän HAF-yň umumylykda 187 milli federasiýa agzasy bar.
Bu gurama ilki-ilkiler, ýagny 1972Monreal Olimpiadasyna çenli FHI (Federation Haltephile International) diýlip atlandyrylýardy.Agyr atletika boýunça dünýä çempionaty ilkinji gezek 1891-nji ýylda Londonda geçirilýär. Şondan bäri-de dünýä çempionaty dürli ýyllarda 23 gezek geçirilse, kä halatlarda 45, hatda, 10 ýyla golaý wagt ara salnan döwürleri hem bolýar.
Dünýä çempionatyna 1990-njy ýyla çenli diňe erkekler gatnaşýardy. Ýöne 1987-nji ýyldan başlap, diňe zenanlaryň arasynda-da aýratyn çempionat geçirilip ugraýar.Zenanlaryň arasyndaky ilkinji çempionat 1987-nji ýylda ABŞ-nyň Daýtona Biç şäherinde geçirilýär. 1991-nji ýyldan bäri bolsa, geçirilýän dünýä çempionatlaryna erkeklerem, zenanlaram gatnaşýar.