Türkmenistanyň futbol çempionatynda 2023-nji ýylyň çempiony belli boldy. 23-nji tapgyrda “Altyn asyr” toparyndan 4-0 hasabynda üstün çykan “Arkadag” topary möwsümiň tamamlanmagyna 4 tapgyr galanda, çempionlygyny yglan etdi.
Duşuşykda “Arkadag” toparyna ýeňiş getiren gollary 44-nji we 68-nji minutlarda Welmyrat Ballakow bilen 58-nji we 60-njy minutlarda Didar Durdyýew geçirdi. Şunlukda, şu möwsümden başlap, ýurdumyzyň çempionatynda çykyş edip başlan “Arkadag” topary ilkinji möwsüminde çempion bolmagy başardy.
Topar geçiren 20 duşuşygynyň ählisinde-de ýeňiş gazanyp, 60 utuk toplady. 5 oýny galan 44 utukly “Altyn asyr” toparynyň birinji orna bolan mümkinçiligi galmady.
Şeýle-de, 23-nji tapgyryň çäginde “Şagadam” öz meýdançasynda “Merwden” 2-1 hasabynda üstün çykdy. Ýer eýeleriniň gollaryny Mekan Aşyrow (57 p) bilen Guwanç Abylow (78), myhmanlaryň ýeke-täk goluny-da Igor Sekow (37) derwezä girizdi.
Paýtagt derbisinde-de “Köpetdag” bilen “Aşgabat” toparlary duşuşyp, myhmanlar 3-1 hasabynda ýeňiş gazandy. Duşuşykda “Aşgabat” toparynyň gollarynyň üçüsini hem Hojanazar Gurbanow derwezä girizip, ol 5-nji, 48-nji, 85-nji minutlarda tapawutlandy. “Köpetdagyň” ýeke-täk goluny bolsa 13-nji minutda Serdar Baýramow öz adyna ýazdyrdy.
Edil şeýle netije “Ahal” bilen “Energetik” toparlarynyň arasyndaky oýunda-da hasaba alyndy. Ilkinji minutlarda garşylykly geçirilen gollardan soň “Ahal” topary 2-nji ýarymyň başynda hem-de ahyrlarynda ýene-de 2 pökgini tora girizmegi başardy. Oýunda “Ahalyň” adyndan Gurbanmuhammet Esenow (2, 46) bilen Begenç Mämiýew (86), “Energetik” toparynyň adyndanam Abdyresul Abdyýew (5) tapawutlandy.