Hormatly Prezidentimiz Gurbanguly Berdimuhamedowyň ylmy taýdan esaslandyrylan durmuş-ykdysady strategiýasynyň esasy maksady Watanymyzy ösdürmekden, halkymyzyň abadançylygyny üpjün etmekden ybaratdyr. Bu syýasatyň ileri tutulýan ugurlary döwlet Baştutanymyzyň giň gerimli maksatnamalarynda öz beýanyny tapdy. Olar sebitleri toplumlaýyn senagatlaşdyrmak, milli ykdysadyýetimizi ösdürmek, halkymyzyň hal-ýagdaýyny gowulandyrmak boýunça wezipeleri çözmäge gönükdirilendir.
19-njy oktýabrda hormatly Prezidentimiz Ministrler Kabinetiniň Başlygynyň obasenagat toplumyna gözegçilik edýän orunbasarynyň, oba hojalyk we daşky gurşawy goramak ministriniň, Aşgabat şäheriniň hem-de welaýatlaryň häkimleriniň gatnaşmagynda sanly wideoaragatnaşyk arkaly nobatdaky iş maslahatyny geçirdi.
Milli Liderimiz ykdysadyýetimizi yzygiderli pugtalandyrmakda, ýurdumyzyň eksport kuwwatyny artdyrmakda obasenagat toplumyna möhüm ornuň degişlidigini belläp, ulgama döwrebap täzeçil tehnologiýalaryň, sanly ulgamyň hem-de ylmyň soňky gazananlarynyň ornaşdyrylmagyna aýratyn ähmiýet berilmelidigini belledi.
Döwlet Baştutanymyz Gurbanguly Berdimuhamedow obasenagat toplumynyň öňünde durýan möhüm wezipeleriň hatarynda tohumçylyk-seçgi işlerini geçirmek hem-de oba hojalyk we maldarçylyk önümleriniň öndürilişini artdyrmak, pudaga telekeçileri işjeň çekmek hem-de gaýtadan işleýän senagaty ösdürmek wezipelerini görkezdi.
20-nji oktýabrda hormatly Prezidentimiz arassaçylyk babatda abadançylygy saklamak, ýokanç keselleriň ýaýramagyna gözegçilik etmek we öňüni almak boýunça anyk çäreleri durmuşa geçirmek, ilata edilýän lukmançylyk hyzmatlaryny mundan beýläk-de kämilleşdirmek meseleleri boýunça iş maslahatyny geçirdi.
Döwlet Baştutanymyzyň belleýşi ýaly, eýýäm dünýäniň ylmy toparlarynda tassyklanylyşyna görä, pandemiýanyň ilkinji günlerinden ýokanjyň diňe bir howa-damja ýoly arkaly däl, eýsem, howa-meýdan arkaly hem ýaýraýandygy baradaky çaklama aýdyldy we tassyklanyldy. Munuň özi ýokanjyň çägini ep-esli giňeldýär.
Şunuň bilen baglylykda, hormatly Prezidentimiz Gurbanguly Berdimuhamedow öňüni alyş çärelerini durmuşa geçirmegi, dünýäniň ýurtlarynda ýokanç keseller bilen bagly ýagdaýlary yzygiderli öwrenmegi we bu ugurda halkara derejede hyzmatdaşlygy dowam etmegi, keselleriň öňüni almak üçin zerur derman we saglygy goraýyş maksatly serişdeler, şol sanda koronawirusa garşy waksinalar bilen doly üpjün etmegi tabşyrdy. Şeýle hem maslahatda döwlet Baştutanymyz ýurdumyzyň lukmançylyk ulgamyny ösdürmek, hususan-da, ýöriteleşdirilen merkezleri döretmek hem-de onuň kadalaşdyryjy-hukuk binýadyny has-da kämilleşdirmek bilen bagly meselelere ünsi çekdi.
21-nji oktýabrda milli Liderimiz geçiren iş maslahatynda ýurdumyzyň halk hojalyk toplumyny mundan beýläk-de ösdürmek, geljek ýyl üçin Döwlet býujetiniň taslamasyny taýýarlamak bilen bagly meseleler ara alnyp maslahatlaşyldy.
Döwlet eýeçiligindäki desgalary we kärhanalary hususylaşdyrmak, paýdarlar jemgyýetlerini döretmek, ýurdumyzyň ykdysadyýetinde hususy pudagyň paýyny artdyrmak meselelerine aýratyn üns berildi.
Döwlet Baştutanymyz ýerine ýetirilmeli işiň esasy ugurlaryna ünsi çekmek bilen, dünýädäki çylşyrymly ýagdaý bilen baglylykda, ykdysadyýetiň esasy pudaklarynyň ösüşini goldamaga we 2021-nji ýylda jemi içerki önümiň 6 göterimden gowrak derejede artmagy üçin durnukly ykdysady ösüşi üpjün etmäge gönükdirilen makroykdysady syýasatyň durmuşa işjeň geçirilmelidigini belledi. Bazar institutlaryny özgertmek, bank ulgamyny kämilleşdirmek esasy wezipeleriň hatarynda kesgitlenildi.
Hormatly Prezidentimiz ileri tutulýan wezipeleriň hatarynda ýurdumyzyň ykdysady we uzak möhletli bähbitler nukdaýnazaryndan netijeli dolandyryş çözgütleriniň kabul edilmegini kesgitledi.
Milli Liderimiz ykdysadyýetimiziň köpugurly esasda ösdürilmegine we bäsdeşlige ukyplylygynyň pugtalandyrylmagyna, eksport kuwwatynyň artdyrylmagyna, daşary ýurtlardan getirilýän harytlaryň ornuny tutýan önümçiligiň döredilmegine, döwlet eýeçiligindäki edaralaryň we desgalaryň hususylaşdyrylmagyna hem-de paýdarlar jemgyýetlerine öwrülmegine, hususy telekeçiligi ösdürmäge gönükdirilen döwlet maksatnamalarynyň ýerine ýetirilişini berk gözegçilikde saklamagy tabşyrdy.
Döwlet Baştutanymyz ýurdumyzy durmuş taýdan ösdürmegiň maksatnamasynyň durmuşa geçirilmegini, bilim ulgamyny kämilleşdirmek, saglygy goraýyş ulgamynyň maddy-enjamlaýyn binýadyny gowulandyrmak boýunça kabul edilen maksatnamalaryň doly ýerine ýetirilmegini möhüm wezipeler hökmünde kesgitledi.
Hormatly Prezidentimiz Gurbanguly Berdimuhamedowyň 22-nji oktýabrda oba hojalyk, söwda toplumlarynyň hem-de Senagatçylar we telekeçiler birleşmesiniň ýolbaşçylarynyň gatnaşmagynda geçiren iş maslahatynda azyk bolçulygyny üpjün etmek, daşary ýurtlardan getirilýän harytlaryň ornuny tutýan önümçiligiň döredilmegi hem-de ýurdumyzyň haryt öndürijilerini höweslendirmek bilen bagly wezipeler ara alnyp maslahatlaşyldy.
Gök-bakja we miwe önümleriniň öndürilişini artdyrmak hem-de olaryň daşary ýurtlardan getirilýän mukdaryny azaltmak, ýurdumyzyň senagat pudaklaryna we hyzmatlar bazaryna sanly tehnologiýalary ornaşdyrmak boýunça milli Liderimiziň ozal beren tabşyryklarynyň ýerine ýetirilişine aýratyn üns berildi.
Milli Liderimiz daşyndan getirilýän harytlaryň ornuny tutýan önümçilikleri döretmek, oba hojalyk pudagynyň düşewüntliligini artdyrmak, gaýtadan işleýän önümçilikleri ösdürmek hem-de ýurdumyzda öndürilýän bäsdeşlige ukyply harytlaryň görnüşlerini giňeltmek boýunça badalga berlen giň gerimli işleriň dowam etdirilmeginiň zerurdygyny nygtap, dükanlary we bazarlary zerur azyk önümleri bilen üpjün etmegiň we olaryň bahalary bilen baglanyşykly meseleleri berk gözegçilikde saklamagyň möhümdigine ünsi çekdi.
Şunuň bilen baglylykda, döwlet Baştutanymyz Gurbanguly Berdimuhamedow 2021-nji ýylda welaýatlarda oba hojalyk ekinleriniň ekilmeli möçberini kesgitlemek, miwe önümleriniň we üzümiň öndürilýän mukdaryny artdyrmak, miweli baglaryň hem-de üzüm nahallarynyň ekilýän meýdanlaryny artdyrmak, maldarçylyk pudagyny ösdürmegiň maksatnamasyny işläp taýýarlamak babatda degişli görkezmeleri berdi.
Şeýle hem hormatly Prezidentimiz ýurdumyzda öndürilen elektron harytlaryň söwdasyny ýola goýmagy, bazarlarda, söwda dükanlarynda arassaçylyk kadalarynyň, söwda düzgünleriniň berk berjaý edilmegine gündelik gözegçiligi amala aşyrmagy tabşyrdy.
Döwlet Baştutanymyzyň şol gün geçiren beýleki iş maslahatynda ýurdumyzyň Bitaraplygynyň 25 ýyllygynyň hormatyna gurlup, ulanylmaga berilmegi meýilleşdirilýän dürli maksatly desgalardaky işleriň ýagdaýy hem-de Garaşsyz Watanymyzyň şanly 30 ýyllygynyň belleniljek ýylynda ulanmaga beriljek desgalaryň açylyş dabaralarynyň maksatnamasyny taýýarlamak bilen baglanyşykly meseleler ara alnyp maslahatlaşyldy.
Hormatly Prezidentimiziň belleýşi ýaly, eziz Diýarymyzyň baky Bitaraplygynyň şanly 25 ýyllygynyň baýram edilmegi mynasybetli täze desgalaryň açylmagy dabaralaryň öwüşginini artdyrmalydyr. Şonuň üçin olary ulanmaga bermäge taýýarlyk görmek boýunça işlere düýpli çemeleşmek gerek. Şol işler gurluşygyň hili hem-de binalaryň we desgalaryň niýetlenen maksady, inžener-tehniki üpjünçilik hem-de içerki we daşarky timarlaýyş işleri, binalaryň bezelişi bilen baglydyr.
Şonuň bilen birlikde, milli Liderimiz Gurbanguly Berdimuhamedow täze gurulýan binalaryň, şol sanda Diwan hem-de Arkadag myhmanhanalarynyň bezeg aýratynlyklaryna üns bermegi tabşyryp, şolaryň zallaryny we otaglaryny ýurdumyzyň suratkeşleriniň döreden naýbaşy eserleri — türkmen topragynyň ajaýyp ýerlerini, gözel tebigatymyzy janlandyrýan şekiller, medeni mirasymyzyň gymmatlyklary bilen bezemek, taryhda öçmejek yz goýan şahsyýetleriň suratlaryny ýerleşdirmek bilen bagly tekliplerini aýtdy.
23-nji oktýabrda hormatly Prezidentimiz sanly wideoaragatnaşyk arkaly Ministrler Kabinetiniň giňişleýin mejlisini geçirdi. Oňa Döwlet howpsuzlyk geňeşiniň agzalary, Aşgabat şäheriniň hem-de welaýatlaryň häkimleri çagyryldy.
Mejlisiň gün tertibine 2021-nji ýyl üçin Döwlet býujetiniň hem-de ykdysadyýetimiziň dürli pudaklarynyň ösüşine gönükdirilen resminamalaryň taýýarlanan taslamalary girizildi. Mundan başga-da, Prezident maksatnamasyny we ýurdumyzy durmuş-ykdysady taýdan ösdürmegiň beýleki maksatnamalaryny ýerine ýetirmegiň barşy bilen bagly meseleler ara alnyp maslahatlaşyldy.
Garalan meseleleriň hatarynda ýangyç-energetika toplumynyň maddy-enjamlaýyn binýadyny yzygiderli pugtalandyrmak, obasenagat toplumynda işleriň ýagdaýy, intellektual ulgamlaryň netijeli işlemegi, dokma pudagyny döwrebaplaşdyrmak, Aşgabatda gurlan Awtoulaglar kärhanalar birleşiginiň binalar toplumynyň açylyş dabarasyna, bag nahallaryny ekmek boýunça ählihalk çäresine hem-de geljek ýylda geçiriljek Welotrek boýunça dünýä çempionatyna görülýän taýýarlyk bilen bagly meseleler boldy.
Milli Liderimiz Gurbanguly Berdimuhamedowa Türkmenistanyň halkara köpçülikleýin habar beriş serişdeleri bilen hyzmatdaşlygyny mundan beýläk-de ösdürmek boýunça amala aşyrylýan çäreler barada hasabat berildi.
Şunuň bilen baglylykda, Türkmenistanyň Hökümetiniň resmi saýtyny açmak baradaky teklip beýan edildi. Onda döwlet Baştutanymyzyň çykyşlaryny, Milli maksatnamalary, ýurdumyzyň halkara başlangyçlaryny we beýleki wakalary beýan etmek göz öňünde tutulýar.
Şunuň bilen bir hatarda, hormatly Prezidentimize Türkmenistanda hem-de daşary ýurtlarda Watanymyzyň Bitaraplygynyň 25 ýyllygy mynasybetli dabaralary hem-de çäreleri geçirmegiň meýilnamasy, bu şanly waka gabatlanyp geçiriljek bedenterbiýe-sport çäreleriniň meýilnamasy barada habar berildi.
Milli Liderimiz Ministrler Kabinetiniň giňişleýin mejlisini jemlemek bilen, döwlet syýasatynyň möhüm ugurlaryna ünsi çekdi. Hormatly Prezidentimiz jemi içerki önümiň ösüş depginini deňeşdirilýän görkezijilerde 6,2 göterim derejede emele getirmek barada aýdyp, bu işleriň ykdysadyýetiň ähli pudaklarynyň durnukly depgin bilen ösmeginiň hasabyna üpjün edilmelidigini belledi.
Mundan başga-da, döwlet Baştutanymyz Gurbanguly Berdimuhamedow häzirki döwürde dünýä ykdysadyýetinde emele gelen çylşyrymly ýagdaýlaryň ýurdumyzyň halk hojalyk toplumyna ýetirýän ýaramaz täsirlerini peseltmek boýunça çäreleriň meýilleşdirilmelidigini belledi. Döwlet Baştutanymyz ykdysadyýetiň ösüşine we raýatlaryň ýaşaýyş-durmuş derejesini has-da ýokarlandyrmaga gönükdirilen maýa goýumlarynyň möçberini artdyrmagyň wajypdygyny aýtdy.
Daşary ýurtlardan getirilýän harytlaryň ornuny tutýan önümleri öndürmegiň, eksport edilýän harytlaryň möçberini artdyrmagyň, elektron senagaty döretmegiň döwlet maksatnamalarynyň üstünlikli amala aşyrylmagyna möhüm ähmiýet berilmelidir.
Hormatly Prezidentimiz geljek ýylda Döwlet býujetiniň umumy çykdajylarynyň 70 göteriminden gowrak möçberini durmuş ulgamyna degişli pudaklara gönükdirmegi tabşyrdy.Bu serişdeleriň 28,5 göterimi bilimi, 10 göterimi saglygy goraýşy we 24,8 göterimi durmuş üpjünçilik ulgamyny maliýeleşdirmäge gönükdirilmelidir. Şeýle hem halk hojalygynda zähmet çekýän işgärleriň zähmet haklarynyň, pensiýalaryň, döwlet kömek pullarynyň, talyp we diňleýji haklarynyň 10 göterim ýokarlandyrylmagyna gönükdirilen çäreler dowam etdiriler.
Döwlet Baştutanymyzyň gol çeken resminamasyna laýyklykda, 2021-nji ýyl üçin Döwlet býujetiniň taslamasyna seretmek üçin ol Mejlisiň garamagyna iberildi. Şeýle hem Türkmenistanyň Prezidenti Gurbanguly Berdimuhamedowyň gol çeken Kararyna laýyklykda, Türkmenaragatnaşyk agentligine Türkmenistanda radioýaýradyş toruny giňeltmek üçin zerur bolan FM radioýaýradyjy enjamlaryny satyn almak, gurnamak we işe girizmek barada Awstriýa Respublikasynyň Heidelberger Druckmaschinen Eastern Europe GmbH kompaniýasy bilen şertnama baglaşmaga ygtyýar berildi.
Döwlet Baştutanymyzyň gol çeken beýleki Kararyna laýyklykda, Dokma senagaty ministrligine önümçilik üçin häzirki zaman enjamlaryny, olary Türkmenistana getirmek, Baýramaly şäherindäki dokma toplumynda hem-de Daşoguz pagta egriji fabriginde gurnamak we sazlamak bilen bagly ähli işleri geçirmek şerti bilen satyn almak barada Italiýa Respublikasynyň Cormatex Srl. kompaniýasy bilen şertnama baglaşmaga ygtyýar berildi.
Şeýle hem hormatly Prezidentimiziň gol çeken Kararlary bilen, Ykdysady, ylmy-tehniki we medeni hyzmatdaşlyk boýunça hökümetara türkmen-gazak toparynyň Türkmen böleginiň düzümi tassyklanyldy, daşky gurşawy goramak meseleleri boýunça Pudagara topar döredildi, ÝUNESKO-nyň işleri barada Türkmenistanyň milli toparynyň düzümi tassyklanyldy.
Hormatly Prezidentimiz dynç günleri bedenterbiýe maşklaryny ýerine ýetirmek, sportuň dürli görnüşleri bilen meşgullanmak ýaly adaty endigine eýerdi hem-de atçylyk toplumyna baryp, halkymyzyň milli buýsanjyna öwrülen ahalteke bedewleri bilen didarlaşdy.
Milli Liderimiz welosipedli gezelenjini dowam edip, daş-töweregiň tokaý zolaklary bilen sazlaşykly utgaşyp gidýän gözelligini, tebigy aýratynlyklaryny synlady. Döwlet Baştutanymyz Gurbanguly Berdimuhamedowyň belleýşi ýaly, tebigat adamlaryň durmuşynda möhüm orun eýeleýär, olary döredijilige we asylly işlere ruhlandyrýar.
Soňra hormatly Prezidentimiz soňky ýyllarda sagaldyş maşklarynyň häzirki zaman görnüşi hökmünde dünýäniň köp ýurtlarynda uly meşhurlyga eýe bolan skandinaw ýörişi bilen meşgullandy.
Häzirki döwürde ýurdumyzda milli Liderimiziň tagallasy bilen, ýaş nesillerimiziň sagdyn ösüp ulalmagy üçin arassa daşky gurşawy goramakdan, dogry iýmitlenmekden başlap, sport bilen giňden meşgullanmaga aýratyn ähmiýet berilýär.
Şöhratly pederlerimiziň asylly däpleriniň döwrebap ösdürilmegi ugrunda alada edýän milli Liderimiz Gurbanguly Berdimuhamedow ahalteke bedewlerine aýratyn gadyr goýýar hem-de halkymyzyň milli buýsanjy bolan behişdi bedewler bilen didarlaşmaga hemişe wagt tapýar.
Milli Liderimiz Türkmenistanyň Prezidentiniň Ahalteke atçylyk toplumynda Hanbeg atly bedew bilen didarlaşdy. Hormatly Prezidentimiz milli seýisçilik däplerine laýyklykda bedewe ideg etdi hem-de onuň bilen birsellem gezelenç etdi.
Döwlet Baştutanymyz ahalteke bedewleriniň tohumynyň döreýşiniň hem-de türkmen atlarynyň özboluşly gylyk-häsiýetleriniň düýpli öwrenilmelidigini hem-de gadymy seýisçilik ýörelgeleriniň döwrebap ösdürilip, geljek nesillere ýetirilmelidigini belleýär.
Geçen şenbe güni, 24-nji oktýabrda paýtagtymyzda Türkmenistanyň Ministrler Kabinetiniň Başlygynyň orunbasarlarynyň, ministrlikleriň we pudak edaralarynyň ýolbaşçylarynyň, habar beriş serişdeleriniň wekilleriniň gatnaşmagynda Türkmenistanyň Mejlisiniň altynjy çagyrylyşynyň on ikinji maslahaty geçirildi.
Onda hormatly Prezidentimiz Gurbanguly Berdimuhamedowyň alyp barýan syýasatynyň ileri tutulýan ugurlaryna hem-de ýurdumyzyň kanunçylyk-hukuk binýadyny kämilleşdirmek boýunça toplumlaýyn maksatnama laýyklykda işlenip taýýarlanylan möhüm kadalaşdyryjy-hukuk resminamalarynyň birnäçesi ara alnyp maslahatlaşyldy.
Esasy meseleleriň hatarynda Türkmenistanyň 2021-nji ýyl üçin Döwlet býujeti hakynda Kanunyň taslamasy hem-de Türkmenistanyň 2019-njy ýyl üçin Döwlet býujetiniň ýerine ýetirilişi hakynda kararyň taslamasy ara alnyp maslahatlaşyldy. Şol taslamalar milli parlamentiň ähli komitetlerinde hem-de aýry-aýry pudaklarda — ýurdumyzyň ministrliklerinde we pudaklaýyn dolandyryş edaralarynda deslapdan ara alnyp maslahatlaşyldy.
Milli Liderimiziň maslahatlaryna laýyklykda, 2021-nji ýyl Döwlet býujetiniň taslamasynda pul serişdeleriniň 70 göterimden gowragy durmuş ulgamyny ösdürmäge, hususan-da, bilim, saglygy goraýyş, medeniýet, döwlet durmuş üpjünçilik ulgamlaryny, ýaşaýyş-jemagat hojalygyny, umumy häsiýetli döwlet hyzmatlaryny ösdürmäge gönükdiriler.
Geljek ýyl maýa goýumlaryň belli bir mukdaryny ýaşaýyş jaýlarynyň hem-de önümçilik we durmuş-medeni maksatly desgalaryň gurluşygyna gönükdirmek göz öňünde tutulýar.
Türkmenistanyň Prezidentiniň Permanyna laýyklykda, möçberi 10 göterim ýokarlandyryljak aýlyk iş haklary, pensiýalar, döwlet kömek pullary, talyp we diňleýji haklary 2021-nji ýyl üçin Türkmenistanyň Döwlet býujetiniň çykdajylarynyň goralan maddalary bolup durýar.
Döwlet Baştutanymyz Gurbanguly Berdimuhamedowyň milli ykdysadyýetimizi diwersifikasiýa ýoly bilen ösdürmäge tarap alyp barýan ugrunyň üstünlikli amala aşyrylmagy netijesinde, geljek ýyl obasenagat toplumy, ulag, aragatnaşyk, gurluşyk, dokma we azyk senagaty pudaklary okgunly ösüşe eýe bolar. Ulag-aragatnaşyk we önümçilik düzümleriniň möhüm desgalarynyň gurluşygy ýokary depginde dowam eder.
Geljek ýylda telekeçiligi, kiçi we orta işewürligi goldamak, ýurdumyzda öndürilýän önümleriň mukdaryny artdyrmak, içerki bazarda azyk bolçulygyny üpjün etmek boýunça çäreleri görmek meýilleşdirildi. Şular bilen birlikde, döwlet eýeçiligindäki desgalary we kärhanalary hususylaşdyrmak, paýdarlar jemgyýetlerini döretmek, Diýarymyzyň ykdysadyýetinde hususy pudagyň paýyny artdyrmak boýunça işler dowam etdiriler.
Türkmenistanyň 2021-nji ýyl üçin Döwlet býujeti hakynda Türkmenistanyň Kanunynyň taslamasyny kabul etmek barada biragyzdan ses beren deputatlaryň gelen netijesine görä, bu resminama sowatly hasaplama esaslanyp, döwletimiziň we jemgyýetimiziň serişdeler kuwwaty bilen berkidildi hem-de ýurdumyzyň ilatynyň bähbidine hyzmat edip, halkymyzyň abadançylygynyň we rowaçlygynyň esaslaryny pugtalandyrar.
Bulardan başga-da, birnäçe meseleler ara alnyp maslahatlaşyldy. Mejlisiň altynjy çagyrylyşynyň nobatdaky maslahatynyň gün tertibine girizilen kanunçylyk namalarynyň taslamalary biragyzdan makullanyldy we kabul edildi.
Geçen hepdäniň beýleki wakalaryna geçip, Maliýe we ykdysadyýet ministrliginde wideomaslahat görnüşinde Kawkaz we Merkezi Aziýa ýurtlarynyň hem-de Halkara pul gaznasynyň wekilleriniň duşuşygynyň geçirilendigini bellemek gerek. Gün tertibinde ykdysadyýeti pandemiýadan soň dikeltmäge goldaw bermekde hususy maliýeleşdirmegi çekmegiň meselelerine garaldy.
Göni wideoaragatnaşyk arkaly Halkara pul gaznasynyň “Sebit ykdysadyýetini ösdürmegiň mümkinçilikleri: Ýakyn Gündogar we Merkezi Aziýa” atly tanyşdyryş çäresi boldy. Esasy pudaklary ýeterlik serişdeler bilen üpjün etmek hem-de goldaw bermek maksatnamasynyň ugurlaryny dogry kesgitlemegiň ilkinji nobatdaky wezipedigi nygtaldy.
Şeýle hem HPG bilen Maliýe we ykdysadyýet ministrlikleriniň we Kawkazyň hem-de Merkezi Aziýa ýurtlarynyň Merkezi banklarynyň başlyklarynyň birinji maslahaty geçirildi. Onda koronawirus pandemiýasyndan soňky dikeldiş döwründe makroykdysady we sebitde durnuklylyk üçin esasy töwekgelçilikler ara alnyp maslahatlaşyldy.
Türkmenistanyň birnäçe ministrlikleriniň we pudaklaýyn dolandyryş edaralarynyň wekilleri Aziýanyň ösüş bankynyň “Merkezi Aziýada sebitleýin ykdysady hyzmatdaşlyk” (MASYH) maksatnamasynyň resmi adamlarynyň wirtual mejlisine gatnaşdylar. Gün tertibine 2030-njy ýyla çenli niýetlenilen bu maksatnamanyň durmuşa geçirilişiniň barşy, köptaraply hyzmatdaşlygy has-da ösdürmek baradaky meseleler girizildi.
Daşary işler ministrliginde onlaýn görnüşinde Merkezi Aziýa ýurtlarynyň (Türkmenistanyň, Gazagystanyň, Gyrgyzystanyň, Täjigistanyň, Özbegistanyň), Owganystan Yslam Respublikasynyň daşary işler ministrleriniň hem-de Ýewropa Bileleşiginiň Daşary syýasat gullugynyň baş sekretary hanym Helga Şmidiň derejesinde ÝB — MA — Owganystan görnüşinde wideoaragatnaşyk arkaly iş maslahaty geçirildi.
Duşuşygyň barşynda sebit hyzmatdaşlygy, Merkezi Aziýa ýurtlarynyň howpsuzlyk ulgamynda Ýewropa Bileleşigi bilen gatnaşyk etmek baradaky meseleler ara alnyp maslahatlaşyldy. Şonuň ýaly-da, Merkezi Aziýa — Ýewropa Bileleşigi mejlisiniň ministrler derejesindäki nobatdaky tapgyryna hem-de ÝB — MA görnüşindäki ýaşyl ykdysadyýet boýunça Birinji foruma görülýän taýýarlygyň barşyna, ÝB-niň Merkezi Aziýa üçin täze Strategiýasynyň durmuşa geçirilmegine garaldy.
Daşary işler ministrliginde Türkmenistanyň we Birleşen Arap Emirlikleriniň arasyndaky hyzmatdaşlyk boýunça bilelikdäki toparyň üçünji mejlisi onlaýn görnüşinde geçirildi. Mejlisiň barşynda iki ýurduň arasyndaky söwda-ykdysady gatnaşyklaryny ösdürmegiň, döwlet we hususy düzümleriň arasyndaky hyzmatdaşlygyň ugurlaryny giňeltmegiň, maýa goýum ýagdaýyny kämilleşdirmegiň meseleleri ara alnyp maslahatlaşyldy.
Milli Liderimiz Gurbanguly Berdimuhamedowyň başyny başlan makroykdysady özgertmelerini hem-de üstünlikli durmuşa geçirilýän giň gerimli özgertmeler maksatnamalaryny nazara alyp, Türkmenistanyň Maliýe we ykdysadyýet ministrliginiň, Merkezi bankyň we Döwlet daşary ykdysady iş bankynyň Germaniýanyň Commerzbank bankynyň Lýuksemburg Beýik Gersoglygyndaky şahamçasynyň ýolbaşçylary bilen göni wideoaragatnaşyk arkaly geçiren duşuşygynyň çäklerinde ikitaraplaýyn hyzmatdaşlygyň möhüm meseleleri ara alnyp maslahatlaşyldy.
Milli Liderimiziň tabşyrmagy boýunça türkmen topary Ýewropada Howpsuzlyk we Hyzmatdaşlyk Guramasynyň (ÝHHG) howpsuzlyk boýunça komitetiniň mejlisinde Türkmenistanyň Bitaraplygyň ýörelgelerine esaslanan howpsuzlyk babatyndaky strategiýasy barada çykyş etdiler.
Maslahata gatnaşyjylar biziň ýurdumyzyň bu ugurdaky esasy başlangyçlary, şol sanda Türkmenistanyň Prezidentiniň başlangyjy bilen 2019-njy ýylyň sentýabrynda BMG-niň Baş Assambleýasynyň 74-nji sessiýasynda kabul edilen 2021-nji ýyly — Halkara parahatçylyk we ynanyşmak ýyly diýip yglan etmek hakyndaky Kararnamasy bilen tanyşdyryldy.
Bitarap Türkmenistan — parahatçylygyň, durnuklylygyň we durnukly ösüşiň hatyrasyna mowzugy bilen geçirilen daşary ýurtlaryň ýaş diplomatlary üçin onlaýn görnüşindäki üç günlük okuwlara dünýäniň 13 ýurdundan — Russiýadan, ABŞ-dan, Hytaýdan, Awstriýadan, Türkiýeden, Pakistandan, Günorta Afrika Respublikasyndan, Malaýziýadan, Wengriýadan, Owganystandan, Özbegistandan, Belarusdan, Ermenistandan ýaş diplomatlaryň 30-dan gowragy gatnaşdy.
DIM-niň esasy diplomatlary, hünärmenleri, ýurdumyzyň ýokary okuw mekdepleriniň professor-mugallymlary Türkmenistanyň hemişelik Bitaraplygynyň özboluşlylygy barada ýaş kärdeşlerine gürrüň berdiler. Şonuň esasynda ýurdumyz hormatly Prezidentimiz Gurbanguly Berdimuhamedowyň baştutanlygynda ählumumy parahatçylygy, durnukly ösüşi üpjün etmek maksady bilen möhüm ädimleri ädýär.
Şeýle hem DIM-niň Halkara gatnaşyklary institutynda Birleşen Milletler Guramasy: halkara parahatçylygyň we durnukly ösüşiň hatyrasyna hyzmatdaşlyk atly halkara maslahat geçirildi. Ol BMG-niň 75 ýyllygyna we Türkmenistanyň hemişelik Bitaraplygynyň 25 ýyllygyna bagyşlanyldy.
Foruma ýurdumyzyň ýolbaşçy düzüminiň, abraýly halkara we jemgyýetçilik guramalarynyň, diplomatik toparlaryň wekilleri, ýokary okuw mekdepleriniň professor-mugallymlar düzümi we talyplary, ýerli we daşary ýurt habar beriş serişdeleriniň žurnalistleri gatnaşdylar.
Maslahatda çykyş edenler hormatly Prezidentimiz Gurbanguly Berdimuhamedowyň baştutanlygynda Türkmenistanyň BMG we onuň ýöriteleşdirilen düzümleri bilen ählumumy parahatçylygy, durnukly ösüşi ilerletmäge gönükdirilen hyzmatdaşlygynyň strategik häsiýetini bellediler.
Şunda Birleşen Milletler Guramasynyň Tertipnamasynda berkidilen, parahatçylygy we howpsuzlygy üpjün etmäge degişli maksatlaryň Türkmenistanyň BMG-niň agzalarynyň ählisi tarapyndan 1995-nji we 2015-nji ýyllarda Baş Assambleýanyň degişli Kararnamalary bilen biragyzdan tassyklanan hemişelik Bitaraplygynyň ýörelgeleri bilen sazlaşýandygy nygtaldy.
Türkmenistanyň hemişelik Bitaraplygynyň 25 ýyllygyna bagyşlanyp, onlaýn görnüşde GDA gatnaşyjy döwletleriň teatr režissýorlarynyň halkara döredijilik onlaýn duşuşygy geçirildi.Ara alnyp maslahatlaşylan esasy meseleler häzirki zaman teatry, tomaşaçylar bilen özara baglanyşyk, nusgawy we döwürdeş ýazyjylaryň eserlerini sahnalaşdyrmakda režissýorlaryň orny, teatr sahnasynda dünýäniň halklarynyň rowaýatlary ýaly ugurlardan hem-de häzirki döwrümizde teatr sungatyny mundan beýläk-de ösdürmek bilen bagly köp sanly beýleki wajyp meselelerden ybarat boldy.
Mejlisde Hindistan Respublikasynyň Türkmenistandaky Adatdan daşary we Doly ygtyýarly ilçisi Widh Pithambaran Nair bilen duşuşyk geçirildi. Duşuşykda ýakynda Türkmenistanyň Prezidenti Gurbanguly Berdimuhamedowyň hem-de Hindistan Respublikasynyň Prezidenti Ram Nath Kowindiň arasynda geçirilen telefon arkaly söhbetdeşlik bilen baglylykda ikitaraplaýyn gatnaşyklaryň, şol sanda parlamentara gatnaşyklary ösdürmegiň ileri tutulýan meseleleri ara alnyp maslahatlaşyldy.
Russiýa Federasiýasynyň Federal Ýygnagynyň Federasiýa Geňeşiniň Başlygy W.Matwiýenkonyň hem-de Türkmenistanyň Mejlisiniň Başlygy G.Mämmedowanyň arasynda geçirilen telefon arkaly söhbetdeşligiň barşynda türkmen-russiýa parlamentara hyzmatdaşlygyny ösdürmegiň we pandemiýa garşy göreşde tagallalary birleşdirmegiň möhüm meseleleri ara alnyp maslahatlaşyldy.
Russiýa Federasiýasynyň Federasiýa Geňeşiniň ýolbaşçysy Mejlisiň toparyny GDA-nyň Parlamentara Assambleýasynyň şu ýylyň noýabrynda geçiriljek nobatdaky mejlisine we 2021-nji ýylyň sentýabr aýynda Sankt-Peterburg şäherinde geçiriljek III Ýewraziýa zenanlar forumyna gatnaşmaga çagyrdy. Şeýle hem parlament dostluk toparlarynyň arasynda onlaýn görnüşinde duşuşygy geçirmek teklip edildi.
24-nji oktýabrda Balkan welaýatynyň dolandyryş merkezinde döwrebap ýyladyşhana toplumynyň açylyşy boldy. Gök we miwe önümlerini ösdürip ýetişdirmäge niýetlenen öňdebaryjy tehnologiýalar bilen üpjün edilen bu toplumda awtomatikanyň kömegi arkaly belli bir ýylylyk we ýagtylyk düzgüni, howanyň çyglylygy berjaý edilýär hem-de toprak iýmitlendiriji maddalar bilen baýlaşdyrylýar.
Dabarada eziz Diýarymyzda azyk bolçulygyny üpjün etmegiň hormatly Prezidentimiz tarapyndan yzygiderli durmuşa geçirilýän durmuş-ykdysady syýasatyň ileri tutulýan ugurlarynyň biridigi nygtaldy. Oba hojalyk pudagyny düýpli özgertmäge, ýurdumyzyň önüm öndürijilerine berilýän hemmetaraplaýyn döwlet kömeginiň netijesinde, bu ulgamda uly ösüşler gazanyldy.
Hormatly Prezidentimiz Gurbanguly Berdimuhamedowyň durmuşa geçirýän döwlet syýasatynyň möhüm ugurlary geçen hepdäniň wakalarynda öz beýanyny tapdy. Şol syýasatyň baş maksady ata Watanymyzy ykdysady taýdan mundan beýläk-de ösdürmek, türkmenistanlylaryň bagtyýar durmuşy üçin aňrybaş şertleri döretmekden ybaratdyr.
(TDH).
https://www.turkmenmetbugat.gov.tm/tk/articles/11137