14-nji fewralda Türkmenistanyň Daşary işler ministrliginiň Halkara gatnaşyklary institutynda Parahatçylygyň ýaş çaparlary atly akyl-paýhas bäsleşiginiň III möwsüminiň VI saýlama oýny geçirildi. Beýik Magtymguly Pyragynyň taglymaty — umumadamzat gymmatlyklarynyň milli şamçyragy atly umumy şygar astynda geçirilýän III möwsümiň VI saýlama oýnunyň temasy Ahmet şa Dürrany. Dürranylar döwletiniň daşary syýasaty we halkara gatnaşyklary diýip atlandyryldy.
TDIM-iň Halkara gatnaşyklary institutynyň resmi saýtynda habar berilmegine görä, Parahatçylygyň ýaş çaparlary atly akyl-paýhas bäsleşiginiň III möwsümiň VI saýlama oýnuna Aşgabat şäherinden 3 sany, Ahal welaýatyndan 1 sany, Balkan welaýatyndan 2 sany we Mary welaýatyndan 2 sany mekdep okuwçysy gatnaşdy.
Gyzgalaňly ýagdaýda geçen bäsleşigiň netijelerine görä, sowallara dürs jogap bermekde has tapawutlanan Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Perhat Orazmyradow, Ahal welaýatynyň Sarahs etrabynyň 10-njy orta mekdebiniň 11-nji synp okuwçysy Döwletgeldi Parahadow ýeňiji boldular. Şeýlelikde, olar Parahatçylygyň ýaş çaparlary atly akyl-paýhas bäsleşiginiň III möwsüminiň ýarym final oýnuna gatnaşmaga hukuk gazandylar.
Bäsleşigiň ýeňijilerine, şeýle-de oňa gatnaşyjylara hemaýatkärler tarapyndan taýýarlanan gymmatbahaly sowgatlar, Türkmenistanyň Daşary işler ministrliginiň Halkara gatnaşyklary institutynyň degişli şahadatnamalary we Hormat hatlary gowşuryldy.
Ýeri gelende bellesek, Parahatçylygyň ýaş çaparlary atly akyl-paýhas bäsleşiginiň III möwsüminiň saýlama oýunlaryna gatnaşjak 64 sany mekdep okuwçysy 2023-nji ýylyň sentýabr aýynda geçirilen ýörite test synaglarynyň üsti bilen saýlanylyp alnypdy. Şol test synaglaryna Türkmenistanyň dürli künjeklerinden ýokary synp mekdep okuwçylarynyň 600-den gowragy gatnaşdy.