18-nji noýabrda Beijing Marriott Northeast myhmanhanasynda Türkmenistanyň Prezidenti Gurbanguly Berdimuhamedowyň Atda wepa-da bar, sapa-da we Türkmen alabaýy atly kitaplary bilen tanyşdyrylyş hem-de türkmen halkynyň taryhy-medeni mirasyna bagyşlanan forum geçirildi.
Türkmenistanyň Pekindäki Ilçihanasynyň guran çärelerine HHR-yň DIM-niň, Hytaýyň daşary ýurtlar bilen dostluk jemgyýetiniň, ylym we işewürler toparlarynyň, köpçülikleýin habar beriş serişdeleriniň wekilleri, şeýle hem syýasatşynaslar, türkmen talyplary gatnaşdylar.
Ýygnananlaryň öňünde Türkmenistanyň HHR-daky ilçisi Parahat Durdyýew, professor Hu Çženhua, Türkmenistanyň at gazanan atşynasy—HHR-yň Atşynaslar assosiasiýasynyň başlygy Ýue Gaofen, Ýüpek ýoly syýahatçylyk kompaniýasynyň dolandyryjy direktory hanym Song Ýançi, şeýle hem Nebit uniwesitetiniň (Pekin ş.) doktoranturasynyň diňleýjisi Rahman Baýramdurdyýew dagy çykyş etdiler.
Bellenilişi ýaly, Türkmenistanyň Prezidenti Gurbanguly Berdimuhamedowyň döwürleriň we nesilleriň, geçen eýýamlaryň we ýurdumyzyň şu gününiň üznüksiz arabaglanşygyna ýugrulan eserleri türkmen halkynyň däp-dessurlaryny we medeni mirasyny wagyz etmekde uly ähmiýete eýedir.
2019-njy ýylda neşir edilen bu iki kitap geçmişe ser salmaga, türkmenleriň ady äleme dolan ahal-teke bedewlerine we belli alabaý tohum itlerine hormat goýmagynyň gözbaşyna düşünmäge mümkinçilik berýär.
Duşuşugyň tematikasy bilen baglanşykly wideoşekiller ahlak-ruhy gymmatlyklaryň ýurdumyzyň häzirki ösüş strategiýasynda eýelelýän möhüm ähmiýeti barada düşünje berdi. Oňa gatnaşanlar kitap neşirleri bilen tanyşdylar, döwlet Baştutanynyň işleri onda hormatly orun tutdy, şeýle hem türkmen halkynyň amaly-haşam sungaty eserleri görkezildi.
Myhmanlara türkmenleriň datly tagamlary hödür edildi. Ýurdumyzyň sungat işgärleriniň çykyşlary çärä baýramçylyk ruhuny çaýdy.
Çäräniň myhmanlaryna Türkmenistanyň Prezidentiniň hytaý, rus we iňlis dillerinde çap edilen kitaplary sowgat berildi.