Ukrain resmileri Russiýanyň Ukrainada uçarmansyz howa ulaglary we raketalar bilen guran hüjümlerinde alty adamyň ýogalandygyny we onlarça adamyň ýaralanandygyny habar berdiler.
Kiýewiň sebitleýin harby dolanşygynyň başlygy Nikolaý Kalaşnik şenbe güni sebitde "adaty ýaşaýyş jaýlaryna" gönükdirilen hüjümlerde bäş adamyň ölendigini we dört adamyň agyr ýaralanandygyny aýtdy.
Kalaşnik hüjümleriň öýleri, bilim edaralaryny, kärhanalary we möhüm infrastruktura gönükdirilendigini mälim edip: "Biz zeper ýeten 30 ýeriň bardygy barada maglumat aldyk" diýip belledi.
Ukrainanyň prezidenti Wolodymyr Zelenskiý Kiýew, Sumy, Harkow, Dnipro we Mikolaý sebitlerinde halas ediş we galyndylary aýyrmak boýunça işleriň dowam edýändigini habar berdi.
Zelenskiý: "Ruslaryň esasy nyşany Kiýew sebitindäki energiýa infrastrukturasy boldy, ýöne gynansak-da, adaty jaýlara, mekdeplere we raýat kärhanalaryna hem gönüden-göni zarba urlup, zyýan ýetirildi" diýip aýan etdi.
Ukrainanyň Harby-howa güýçleri Russiýanyň 430 uçarmansyz howa ulagyny we 68 raketa uçurandygyny, howa goranyş ulgamlarynyň degişlilikde olaryň 402-sini we 68-sini täsirsiz ýagdaýa getirendigini habar berdi.
Ýerli häkimiýetleriň maglumatyna görä, günüň ahyrynda Zaporožýe sebitiniň töweregindäki ýaşaýyş jaý zolagyna rus güýçleri tarapyndan guralan hüjümde bir adam ýogaldy, 2-si çaga jemi 18 adam ýaralandy.