1-nji awgustda Türkmenistanyň Stambuldaky konsulhanasynyň öňünde türkmen aktiwistleri proteste ýygnandylar.
Şol mitingi gurnaýjylaryň birisi, “DWT” oppozisiýa hereketiniň lideri Myrat Gurbanow “ÝuTube” kanalynda wideo çykyş ýaýratdy.
Gurbanowyň sözlerine görä, türkmen diplomatlary protestçileri terroristler hökmünde görkezip türk polsiýasyny çagyrypdyrlar.
Protesti geçirmäge rugsadyň alynandygyna garamazdan, hukuk goraýjylar aksiýany goşmaça Stambulyň häkimligi bilen ylalaşmalydygyny aýdypdyrlar.
Aksiýa ýygnananlar konsulhananyň öňünden uzaklaşandan soňra, iki sany maşynda agressiw ýaş adamlar gelip, aktiwistlere hüjüm edipdir we olaryň birini ýençmäge başlapdyrlar.
Myrat Gurbanowyň habaryna görä, hüjüm edijiler “Türkmenistanyň Hronikasynyň” habarçysyny gözläpdirler.
Gazaply urlan aktiwisti “tiz kömek” ulagy bilen alyp gidipdirler. Ýaş adamlar bolsa, gizlenipdirler.
Redaksiýamyza gelip gowşan wideo ýazgyda “tituşkalaryň” birisi protestçileriň adresine paýyş sözler aýdyp,” öz ýurduna gitmeklerini” talap edýär.
Agressiw ýaş erkek 34 BNZ 674 sanly “Ford Tranzit” kysymly ulag bilen gidýär.
Protestden soňra polisiýa Farhad atly blogçyny köçeden tutýar we Türkmenistanyň konsulahanasynyň binasyna salýar.
Gowşan ahyrky maglumatlara görä, Farhady goýberipdirler.
Wiki güwänamasy: “Tituşka” termini ukraýin sportçysy Wadim Tituşkonyň ady bolup, 2013-2014-nji ýyllarda Ukraýinadaky protest aksiýalar wagtynda döredi.
Tituşkalar diýlip fiziki güýç ulanyp zorlukly prowokasiýalary, ýumruklaşmalary we beýleki çäreleri gurnamak üçin ýerli häkimiýetleriň gizlin hakyna tutan adamlary atlandyrylýar.The post Stambuldaky protest aksiýada türkmen aktiwistlerine “tituşkalary” küşgürdiler, olar “Türkmenistanyň Hronikasynyň” habarçysyny gözlediler, diplomatlar bloggeri ilçihana dykdylar first appeared on Türkmenistanyň Hronikasy.