Gazagystanyň Türkmenistana maýa goýumlarynyň möçberi 120 million ABŞ dollaryndan geçdi diýip, Gazagystanyň Prezidenti Kasym-Žomart Tokaýew duşenbe güni Astanda giňişleýin düzümde Türkmenistanyň Prezidenti Serdar Berdimuhamedow bilen geçiren duşuşygynda aýtdy. Bu barada Gazagystanyň Prezidentiniň resmi metbugat gullugy habar berýär.
Tokaýewiň sözlerine görä, Gazagystanda ykdysady gatnaşyklary ösdürmekde möhüm goşant goşýan takmynan türkmen maýadarlarynyň hasabyna 140 kompaniýa üstünlikli hereket edýär.
Duşuşygyň dowamynda döwlet Baştutanlary iki ýurduň arasyndaky söwda-ykdysady, medeni-we ynsanperwer hem-de transport-logistika ulgamlaryny öz içine alýan hyzmatdaşlygyň ileri tutulýan ugurlaryny ara alyp maslahatlaşdylar. Energetika, senagat hyzmatdaşlygy, oba hojalygy, IT, bilim we saglygy goraýyş ulgamlarynda bilelikdäki taslamalara hem aýratyn üns berildi.
Gazagystan Prezidenti ýurtlaryň arasynda ähli ugurlarda işjeň we netijeli gatnaşyklaryň alnyp barylýandygyny aýtdy. Şeýle hem hökümet derejesinde hem-de pudagara gatnaşyklar arkaly hyzmatdaşlygyň köpugurlar boýunça işleriň dowam etdirilýändigini belledi.
Tokaýewiň pikiri boýunça, Astana bilen Aşgabat sebitleýin we halkara gün tertibindäki esasy meseleleri çözmek boýunça umumy garaýyşlara we meňzeş çemeleşmelere eýedir. Soňky bäş ýylyň dowamynda iki ýurduň arasyndaky özara söwda dolanşygy dört esse artyp, ýarym milliard ABŞ dollaryndan geçdi.
2025-nji ýylyň ýanwar-sentýabr aralygynda Türkmenistanyň we Gazagystanyň arasyndaky ikitaraplaýyn söwda dolanyşygy 363,6 million ABŞ dollaryna ýetip, geçen ýylyň degişli döwri bilen deňeşdirilende 5,4% ýokarlandy.