ABŞ-nyň Prezidenti Donald Tramp iýun aýynda guralan hüjüme garamazdan Eýran ýadro maksatnamasyny gaýtadan dikeltse ABŞ-nyň Eýrana garşy täze hüjüm gurap biljekdigini aýtdy.
Ýekşenbe güni Florida ştatyndaky Mara-Lago kabulhanasynda Ysraýylyň Premýer-ministri Binýamin Netanýahu bilen metbugata beýannama beren Tramp, “Eýranyň güýçlenmäge çalyşýandygyny duýýaryn, eger şeýle bolsa onda munyň öňü alynmaly. Olary nyşana alarys” diýdi.
Eýran bilen gepleşiklere açykdygyny aýdan Tramp, ylalaşyk gazanmagyň has dogry boljakdygyny belledi. ABŞ-nyň Prezidenti “Geçen gezek olara garşy uly göwrümli hüjüm guralmazdan öň ylalaşyk gazanyp bilerdiler” diýdi.
Tramp tomus aýlarynda ýadro gepleşikleriniň dowam edýän günlerinde Ysraýyla Eýrana hüjüm guramazlygy üçin çagyryş edipdi.
Emma Ysraýyl çagyryşa garamazdan Eýrana hüjüm etdi. Bu ABŞ-nyň Fordowdaky, Natanzdaky we Yspyhandaky ýadro desgalarynyň nyşana alynmagyna sebäp boldy we çaknyşyklar 12 gün dowam etdi.