Watan gazedi: "Prezident Erdoganyň yzly-yzyna möhüm duşuşyklary" söz başyly habarynda, Prezident Rejep Taýýip Erdoganyň, düýn 1 günlük sapar bilen baran Wengriýada, ýurduň Premýer ministri Wiktor Orban bilen ikiçäk duşuşyk geçirendigini habar berýär. Erdogan mundan başgada Özbegistanyň Prezidenti Şewket Mirziýoýew we Serbiýanyň Prezidenti Aleksanr Wuçiç bilen duşuşyk geçirdi.
Hürriýet gazedi: "Ersin Tatar: Biziň hiç bir ýurduň topragynda gözümiz ýok" söz başyly habarynda, DKTR-nyň Prezidenti Ersin Tataryň, DKTR-nyň özygtyýarlylygynyň çägindäki territoriýasynda gurulýan Pile-Ýigitler ýolunyň gurluşyk işleri bilen baglanşykly: "Bu ýolyň uly bir bölegi DKTR-nyň serhetleriniň çäginde ýerleşýär.
Ynsanperwer sebäpler bilen ähmiýetli, harby maksat ýok, öz ygtyýarlylygymyzy gorarys.Biziň hiç bir ýurduň topragynda gözümiz ýok" diýendigini mälim edýär.
Ýeni Şafak gazedi: "Germaniýanyň metbugatynda ünsleri özüne çekýän analiz" söz başyly habarynda, Germaniýanyň metbugatynyň Türkiyäniň, Russiýanyň we Kataryň eýýäm 1 aýdan gowrak wagt bäri işjeň bolmadyk Gara deňiz Galla geçelgesi ylalaşygyna alternatiwa taýarlandyklaryny öňe sürendiklerini beýan edýär.
Galla üpjünçiliginiň hemaýatkärligini Kataryň, ylalaşygyň koordinasiýasyny bolsa Türkiyäniň öz üstüne aljakdygyny aýdan gazediň berýän habaryna görä, ady agzalýan 3 ýurt ylalaşyk gazanmak üçin taýarlyk görýär.
Star gazedi: "Ministr Ýumakly: Türk dünýäsine açylan gapy bolar" söz başyly habarynda, Oba hojalyk we tokaýçylyk ministri Ibrahim Ýumaklynyň, Zengezur koridory bilen baglanşykly: "Nesip bolsa koridor açylan mahaly Türk dünýäsine açylan bir gapy bolar, hem söwda hem medeni gatnaşyklarymyz ýene-de bir gezek biri-birine gowuşar" diýendigini aýan edýär.
Sabah gazedi: "Türkiyäniň ýygyndysy 2 duşuşykda 2 ýeňiş gazandy" söz başyly habarynda, Türkiyäniň Milli Woleýbol zenanlar ýygyndysynyň 2023 CEV zenanlar Ýewropa Woleýbol çempionatyndaky 2-nji duşuşygynda Azerbaýjandan 3-0 hasabynda üstün çykandygyny we 2 duşuşykda 2 ýeňiş gazanandygyny habar berýär. Milli ýygyndy topar ilkinji duşuşykda Şwesiýanyň ýygyndysyny ýeňipdi.