Türkmenistanyň Rumyniýadaky ilçisi Annamämmet Annaýew Rumyniýanyň “Chimcomplex” kompaniýasynyň dolandyryjylar geňeşiniň başlygy Ştefan Wuza bilen duşuşyk geçirdi. Duşuşykda täze senagat taslamalaryna daşary ýurt maýa goýumlaryny çekmek mümkinçilikleri, şeýle hem gaz senagatynda we himiýa pudagynda hyzmatdaşlygy ösdürmegiň ugurlary ara alnyp maslahatlaşyldy.
Türkmen tarapy nebit-gaz hem-de senagat toplumyny döwrebaplaşdyrmak, pudagyň ösüşiniň esasy ugurlary we sebitiň energetika howpsuzlygyny üpjün etmek boýunça alnyp barylýan çäreler barada giňişleýin maglumat berdi. Bu barada duşenbe güni Türkmenistanyň resmi metbugaty habar berdi.
“Chimcomplex” kompaniýasynyň ýolbaşçylary Türkmenistanda hyzmatdaşlyk gatnaşyklaryny berkitmäge we täze ykdysady mümkinçilikleri bilelikde öwrenmäge gyzyklanma bildirdiler.
Duşuşygyň netijeleri boýunça taraplar gepleşikleri dowam etdirmäge hem-de özara bähbitli hyzmatdaşlygyň anyk ugurlaryny kesgitlemäge taýýardyklaryny tassykladylar.
Mundan ozal, “Chimcomplex” kompaniýasy “Türkmenhimiýa” konserni bilen hyzmatdaşlykda Türkmenrumyn himiýa kompaniýasyny döretmek teklibini öňe sürüpdi. Bu taslama senagat ösüşine we ykdysady hyzmatdaşlygyň berkemegine ýardam etmegi maksat edinýär.