Goşulyşmazlyk hereketine agza ýurtlaryň we beýleki ýurtlaryň lukmançylyk we sanitariýa edaralarynyň ylmy konferensiýasy şu ýyl Aşgabatda geçiriler. Bu konferensiýa lukmanlar, alymlar we bilermenler gatnaşarlar. Bu barada Türkmenistanyň resmi metbugaty penşenbe güni habar berdi.
Türkmen wekiliýeti 5-7-nji iýul aralygynda Wengriýanyň Budapeşt şäherinde geçirilen Daşky gurşaw we saglyk boýunça ýedinji ministrler derejesindäki konferensiýanyň çäginde BSGG-nyň Ýewropa Sebitleýin edarasynyň direktory doktor Hans Klýuge bilen lukmançylyk konferensiýasyny geçirmek meselesini ara alyp maslahatlaşdylar.
Habarda bellenilişi ýaly, türkmen wekiliýetiniň düzümine Türkmenistanyň Ministrler Kabinetiniň, Saglygy goraýyş we derman senagaty ministrliginiň hem-de Oba hojalyk we daşky gurşawy goramak ministrliginiň ýolbaşçylary we wekilleri girdi.
Bu çäräniň netijesi boýunça adamlaryň saglygyny dikeltmek, dünýäniň gülläp ösmegini üpjün etmek we 2023-2030-njy ýyllarda durnukly geljege ýetmek üçin Budapeşt Jarnamasy we Ýol kartasy kabul edildi.
Goşulyşmazlyk hereketi bu dünýäniň 120 döwletini harby hereketlerine gatnaşmazlyk ýörelgelerinde birleşdirýän halkara guramadyr. Goşulyşmazlyk hereketi 1961-nji ýylyň sentýabr aýynda Belgrad konferensiýasynda resmi taýdan döredildi.