16 ýaşly agyr atletikaçy Gülälek Kakamyradowa Meksikanyň Leon şäherinde ýetginjekleriň arasynda geçirilýän dünýä çempionatynda 59 kilograma çenli agram derejesinde çykyş etdi. Bu derejede başga bir ildeşimiziň ― Medine Amanowanyň kiçi bürünç medala mynasyp bolandygyny habar beripdik.
Gülälek Kakamyradowa hem 14 türgeniň arasynda 9-njy orny eýelemegi başardy. Ol ştangany galdyrmagyň ilkinji görnüşinde 74, ikinji görnüşinde 91 kilogram agyrlygy eýgerip, çykyşyny 165 kilogramlyk netije bilen tamamlady.
Şunda onuň sekizinji orny eýelän italiýaly türgen Greta De Risodan bary-ýogy 1 kilogram yza galyp, onunjy ornuň eýesinden ― polşaly Zuzanna Maria Slipekden 4 kilogram öňe saýlanandygyny aýtmak gerek.