Türkmenistanyň Prezidenti Serdar Berdimuhamedow sişenbe güni Türkmenistanyň hemişelik Bitaraplygynyň 28 ýyllygy mynasybetli Bitaraplyk binasyna gül goýmak dabarasyna gatnaşdy. Bu barada Türkmenistanyň resmi metbugaty habar berdi.
Türkmenistanyň Bitaraplyk binasyna gül goýmak dabarasyna Türkmenistanyň Mejlisiniň we Halk Maslahatynyň wekilleri, Hökümet agzalary, ministrlikleriň hem-de pudaklaýyn dolandyryş edaralarynyň ýolbaşçylary, Türkmenistanyň daşary döwletlerdäki ilçileri, ýurtdaky diplomatik missiýalaryň we halkara guramalaryň wekilhanalarynyň ýolbaşçylary, ýaşulular, jemgyýetçilik guramalarynyň, köpçülikleýin habar beriş serişdeleriniň wekilleri gatnaşdylar.
Halkara Bitaraplyk güni mynasybetli dabaralar Türkmenistanyň ähli künjeklerinde joşgunly konsert maksatnamalary, medeni-köpçülikleýin, sport çäreleri bilen utgaşdy.
Şeýle hem Özbegistanyň Prezidenti Şawkat Mirziýoýew, GDA-nyň Baş sekretary Sergeý Lebedew, Belarus Respublikasynyň Prezidenti Aleksandr Lukaşenko, Katar Döwletiniň Şeýhler maşgalasynyň agzasy Faýsal bin Naser bin Hamad Al Tani Türkmenistanyň Prezidenti Serdar Berdimuhamedowa Türkmenistanyň hemişelik Bitaraplygynyň 28 ýyllygy mynasybetli gutlag hatlaryny ugratdylar.