Türkmenistanyň Prezidenti Serdar Berdimuhamedow penşenbe güni iki günlük döwlet sapary bilen Gruziýa bardy. Bu barada "Türkmenistan" gazeti habar berýär.
Iki ýurduň döwlet baýdaklary bilen bezelen Tbilisiniň Şota Rustaweli adyndaky Halkara howa menzilinde Türkmenistanyň döwlet Baştutanyny Gruziýanyň resmi wekilleri hem-de türkmen wekiliýetiniň agzalary garşy aldylar.
Habarda bellenilişi ýaly, Türkmenistanyň Prezidenti saparyň dowamynda Gruziýanyň döwlet ýolbaşçylary bilen ikiçäk hem-de giňeldilen düzümde gepleşikleri geçirer. Şeýle hem saparyň çäginde Türkmenistan — Gruziýa işewürlik maslahaty we ýurdumyzda öndürilen önümleriň göçme sergisiniň geçirlmegi meýilleşdirilýär we bu çäräniň iki ýurduň arasyndaky söwda-ykdysady gatnaşyklara hil taýdan täze itergi bermegine, işewürlik düzümleriniň arasynda netijeli hyzmatdaşlygyň mundan beýläk hem ilerledilmegine garaşylýar.
Türkmenistan bilen Gruziýanyň arasynda diplomatik gatnaşyklar 1992-nji ýylyň 16-njy iýulynda ýola goýuldy. Ýokary derejeli saparlaryň we gepleşikleriň esasynda ikitaraplaýyn hyzmatdaşlyklar yzygiderli ösdürilýär.