Maýa Kulyýewa adyndaky Türkmen milli konserwatoriýasynda Magtymguly adyndaky milli sazly drama teatrynyň artisti Maýa Weligylyjowa bilen aýdym sazly döredijilik duşuşygy geçirildi.Bu duşuşyga konserwatoriýanyň talyplary we mugallymlary gatnaşdy.
Söhbetdeşligi “Halk saz gurallary” hünäriniň III ýyl talyby, Ýaş alymlar geňeşiniň ýanyndaky talyp döredijilik toparynyň agzasy Jennet Myradowa alyp bardy.Duşuşygymyzyň başynda Maýa Weligylyjowa özüniň döredijilik ýoluna gelişi barada gyzykly gürrüňleri berdi.
Onda talyp ýaşlar dürli temalarda özlerini gyzyklandyrýan birnäçe soraglary berdiler.Maýa Weligylyjowa talyplaryň beren soraglaryna özüniň baý durmuş we döredijilik tejribesinden ugur alyp, birnäçe mysallaryň we tejribeleriň üsti bilen jogap berdi.
Duşuşygyň dowamynda “Bagşyçylyk sungaty” kafedrasynyň II talyby Sahydursun Mätiýewanyň ýerine ýetiren birnäçe ajaýyp aýdymlary ýaňlandy.Soňra myhman talyp ýaşlara hünäriňiziň daşyndan döredijilik bilen meşgullanýanlaryňyz barmy diýen soragyna “Saz mugallymçylygy” hünäriniň II ýyl talyby Ýusup Meredow öz döreden goşgularyndan okap berdi.
Maýa Weligylyjowa talyp ýaşlaryň hünärine bolan söýgüsini artdyrmak babatynda beren gymmatly maslahatlary has hem täsirli boldy.Söhbetdeşligiň ahyrynda beren gyzykly gürrüňleri we maslahatlary üçin konserwatoriýanyň mugallymlary, talyplary tarapyndan myhmana hoşallyk sözleri aýdyldy.
Aýjahan ABALAKOWA Maýa Kulyýewa adyndaky Türkmen milli konserwatoriýasynyň “Sazşynaslyk” hünäriniň II ýyl talyby