ABŞ-nyň goşunynyň beren maglumatyna görä, Amerikanyň KC-135 kysymly uçary Yragyň günbatarynda heläkçilige uçrady, ikinji uçar bolsa howpsuz ýagdaýda gondy.
ABŞ-nyň Ýakyn Gündogardaky güýçlerinden jogapkär bolan ABŞ-nyň Merkezi serkerdeligi (CENTCOM) beren beýanatynda: "Uçarlaryň biri Yragyň günbatarynda heläkçilige uçrady, ikinjisi bolsa howpsuz ýagdaýda ýere gondy. Bu waka duşmanyň ýa-da dostlukly güýçleriň ot açmagy sebäpli bolmady" diýdi.
KC-135 harby uçary Kuweýtiň üstünden ýaran ýurtlaryň ýalňyşlyk bilen ot açmagy arkaly üç sany F-15 uçary urlup düşürilenden soň, ABŞ-nyň Eýrana garşy uruşda ýitiren harby uçarlarynyň azyndan dördünjisi boldy.
ABŞ-nyň Harby-howa güýçleriniň maglumatlaryna görä, 60 ýyldan gowrak wagt bäri ulanylyp gelinýän KC-135 uçarlarynyň ekipažy adatça üç adamdan ybarat: uçarman, ikinji uçarman we beýleki uçarlara ýangyç guýmak üçin ulanylýan ştangany dolandyrýan üçünji adam.
28-nji fewralda başlan urşuň başynda Kuweýtiň harby güýçleri ýalňyşlyk bilen üç sany Amerikanyň F-15E söweş uçaryny ot açyp ýere gaçyrypdylar. Emma CENTCOM-yň maglumatyna görä, bortdaky alty ekipaž agzasynyň ählisi özleriniň katapultirleme oturgyçlaryny ulanyp, katapultirlenmegiň hötdesinden geldiler.
Şol wagt CENTCOM bu wakanyň Eýranyň uçarlarynyň, ballistik raketalarynyň we dronlarynyň hüjümleri ýaly çaknyşyklar mahalynda bolandygyny habar beripdi.