AFK Çempionlar ligasy 2023/24-iň birinji tapgyryndan orun alan Ahal — Al-Feýha oýnuna 19966 sany janköýer stadionda tomaşa etdi. Bu barada duşuşyga gatnaşan Turkmenportalyň habarçysy habar berýär.
Ahal — Al-Feýha oýny Aşgabat köpugurly stadionynda geçirildi. Duşuşyga iordaniýaly referi Adam Mahadmehiň ýolbaşçylygyndaky eminler topary eminlik etdi. Oýun 1:0 hasabynda Ahalyň ýeňşi bilen tamamlandy. Ýer eýelerine ýeňiş getiren ýeke-täk goly 51-nji minutda Elman Tagaýew Al-Feýhanyň derwezesine ýerledi.
Oýundan soňky metbugat konferensiýasynda Saud Arabystanynyň Al-Feýha toparynyň baş tälimçisi Wuk Raşowiç Ahaly on ikinji oýunçy hökmünde birkemsiz goldamagy başaran türkmen janköýerlerine ýokary baha berdi.
Ýeri gelende bellesek, Ahal AFK Çempionlar ligasynyň indiki tapgyrynda BAE-de Al-Aýnyň myhmany bolar. Al-Feýha bolsa Özbegistanyň Pahtakoryny kabul eder. Duşuşyklaryň ikisi hem 3-nji oktýabrda geçiriler.