Türkmenistanyň paýtagty Aşgabat şäherinde 2026-njy ýylyň 2425-nji maýynda geçiriljek “Ak şäherim Aşgabat 2026” atly halkara sergi we maslahat şäher infrastrukturasy, energetika, senagat hem-de gurluşyk ulgamlarynda halkara maýa goýum we tehnologik hyzmatdaşlygyny ösdürmek üçin esasy meýdança öwrüler. Bu barada çäräni gurnaýjylar habar berdi.
Çäre şäherleriň durnukly ösüşi, senagaty döwrebaplaşdyrmak we geljegiň energetika ulgamlarynyň mümkinçilikleri boýunça pikir alyşmak maksady bilen halkara maliýe institutlarynyň wekillerini, öňdebaryjy inžener-gurluşyk we tehnologik kompaniýalary, şeýle hem döwlet edaralaryny bir ýere jemlär.
Habarda bellenilişi ýaly, çärä “Çalık Holding”, “Rönesans Holding”, “Siemens Energy”, “Pietro Fiorentini” we “Bitdeer Technologies Group” kompaniýalarynyň ýolbaşçylarynyň gatnaşjakdygy tassyklanyldy.
Maslahatlaryň dowamynda “akylly” şäher infrastrukturasy, sanly gurluşyk tehnologiýalary, senagat önümçiligi, energiýa netijeliligi, şeýle hem häzirki zaman hasaplaýyş ulgamlaryny we ýokary öndürijilikli maglumat merkezlerini ösdürmek meselelerine aýratyn üns berler.
Maksatnamanyň çäklerinde Energiýanyň gaýtadan dikeldilýän çeşmeleri boýunça halkara agentliginiň (IRENA) baş direktory Françesko La Kamera hem çykyş edip, geljegiň energetikasy we durnukly ösüş meselelerine bagyşlanan pikir alyşmalara gatnaşar.
Häzirki wagta çenli foruma 45 ýurtdan 450-den gowrak wekiliň gatnaşjakdygy tassyklandy.
“Ak şäherim Aşgabat 2026” atly halkara sergä we maslahata gatnaşmaga gyzyklanma bildirýän taraplar giňişleýin maglumatlar bilen çäräniň resmi saýtynda tanyşyp bilerler.