Türkmenistanyň wekiliýeti 27 29-njy aprelde Gazagystan Respublikasynyň Almaty şäherinde geçirilýän DARYA SCAFFOLD halkara maslahatyna gatnaşdy.Maslahat Ýewropa Bileleşiginiň we Ýewropa Bilim gaznasynyň goldamagy bilen DARYA başlangyjyň çäginde guraldy. Çäre mugallymlaryň hünär derejesini ýokarlandyrmaga, bilim berilişini döwrebaplaşdyrmaga we okatmak üçin döwrebap usullary girizmäge gönükdirilendir. Üç günlik okuw maslahaty Merkezi Aziýa ýurtlarynyň Gazagystanyň, Gyrgyzystanyň, Täjigistanyň, Türkmenistanyň we Özbegistanyň wekillerini bir ýere jemledi. Çärä biziň ýurdumyzdan 8 wekil gatnaşdy, olar Türkmenistanyň Bilim ministrliginiň işgärleri, ýokary we orta hünär mugallymçylyk okuw mekdepleriniň ýolbaşçylary we mugallymlarydyr.
Maslahatyň dowamynda oňa gatnaşyjylar taslama işlerini taýýarlamaga amaly çemeleşme, mugallymlaryň SCAFFOLD innowasion pedagogik usulyny ulanyp hünär taýdan ösüş maksatnamasyny durmuşa geçirmegi we oňa baha bermegi öwrendiler. Çäräniň maksatnamasy interaktiw sessiýalary, işiň toparlaýyn görnüşlerini we tejribe bilen paýlaşmak işlerini öz içine almak bilen bu täzelikleri milli bilim ulgamyna girizmäge mümkinçilik döretdi.
Maslahatyň netijeleri boýunça gatnaşyjylar tarapyndan mugallymlaryň hünär derejesini ýokarlandyrmak maksatnamasynyň taslamalary, olaryň täsirliligini bahalandyrýan gurallar, şeýle-de kabul edilen çözgütleri geljekde ornaşdyrmak üçin amaly meýilnamalar işlenip düzüler. Şeýle çäreleriň geçirilmegi Merkezi Aziýanyň ýurtlarynda bilim ulgamyny ösdürmekde, geljekki mugallymlary taýýarlamagyň hilini ýokarlandyrmakda we bilim ulgamynda halkara hyzmatdaşlygy berkitmekde möhüm goşant bolup durýar.