Türkmenistanyň Bitaraplygynyň 30 ýyllygy mynasybetli Aşgabatda başlanan Bitaraplyk Kubogy atly hokkeý boýunça ýaryşy sekiz topary bir ýerde jemledi. Ýaryş sporty we sagdyn durmuş ýörelgesini ündemek maksady bilen, Türkmenistanyň Bedenterbiýe we sport baradaky döwlet komitetiniň goldawy bilen Türkmenistanyň Hokkeý federasiýasy tarapyndan ýola goýuldy.
Duşuşyklar Türkmenistanyň Içeri işler ministrliginiň Galkan gyşky sport merkezinde we Gyşky oýunlar sport toplumynda geçirilýär.Bäsleşige gatnaşýanlar ýaryşyň birinji tapgyrynda iki toparça bölündi.A topaçra Watançy (Goranmak ministrliginiň Harby instituty), Merdana (Serhet instituty), Şir (Söwda we daşary ykdysady gatnaşyklar ministrligi) we Oguzhan (Türkmengaz döwlet konserniniň Türkmengazawtomatika müdirligi) toparlary girdi.
B toparça Galkan (Türkmenistanyň Içeri işler ministrligi), Nesil (Türkmenistanyň Içeri işler ministrliginiň instituty), Bürgüt (Türkmenistanyň Bedenterbiýe we sport baradaky döwlet komitetiniň sport mekdebi) we Alp Arslan (Ulag we aragatnaşyk toplumy) toparlary girdi. Ýaryşyň düzgünnamasyna laýyklykda, toparlaryň ýeňijileri finalda baş baýrak ugrunda bäsleşerler, ikinji orny eýelän toparlar bolsa özara bäsleşikde bürünç medalyň eýesini kesgitlärler. Ýaryşyň açylyş duşuşygynda Oguzhan topary Merdana toparyny 5:1 hasabynda utdy, başga bir duşuşykda bolsa Bürgüt topary Nesil toparyndan 16:9 hasabynda üstün çykdy. 16-njy dekabrda tamamlanjak bu ýaryşyň öňýany, Galkan sport merkezinde Halkara hokkeý federasiýasynyň (IIHF) goldawy bilen guralan eminlik maslahaty geçirildi.
Forumyň maksatnamasy türkmen eminlerini taýýarlamaga we ýaryşyň häzirki zaman düzgünlerini öwrenmäge bagyşlandy.Maslahatda IIHF-niň adyndan Gazagystanyň hokkeý federasiýasynyň 33 ýaşly wekili, 12 ýyllyk tejribesi bolan halkara emin Wladimir Suslow çykyş etdi.
Ol ozal dört sany dünýä çempionatynda, Aziýanyň iki Kubogynda we 2020-nji ýyldaky Olimpiýa saýlama ýaryşynda eminlik edipdi.