AkEnMar PR agentligi bilen Galam kanselýariýa harytlarynyň dükany aşgabatly mekdep okuwçylary 24-nji martda Rubigiň kubigini tiz ýygnamak boýunça geçirilýän ýaryşa çagyrýarlar.
Bu bäsleşige 1-nji synpdan başlap, 11-nji synpa çenli ähli mekdep okuwçylary gatnaşyp bilerler. Ýaryş iki kategoriýada — 1-den 5-nji synpa çenli, şeýle-de 6-dan 11-nji synpa çenli okuwçylaryň arasynda geçiriler.
Her toparda üç sany baýrakly orun boýunça ýeňijiler yglan ediler we olara Galam, Bossan Concept dükanlarynyň hem-de Ak Tam Bazary söwda meýdançasynyň hemaýatkärlik etmeginde baýraklar gowşurylar.
Spidkubing boýunça geçirilýän ýaryşa gatnaşmaga isleg bildirýän okuwçylar şu telefon belgä jaň edip habarlaşyp bilerler: +993 65 75-42-11
Pikirlenmegi talap edýän kub görnüşli bu täsin oýun 1974-nji ýylda wengriýaly heýkeltaraş hem-de binagär Ernýo Rubik tarapyndan oýlanyp tapyldy. Geçen asyryň 80-nji ýyllarynda bolsa bu güýmenje oýny uly meşhurlyga eýe bolup başlady.
Rubigiň kubigini düzmek adamyň duýgurlygyny we logiki pikirlenmek başarnygyny terbiýeleýär, esasan-da tiz oňyn netije çykarmak endigini ösdürýär. Islendik bir logiki oýun ýaly, Rubigiň kubigi hem örän ünsli çemeleşmegi talap edýär.