Aziýanyň Futbol konfederasiýasy Aziýanyň Kubogy — 2023-iň saýlama tapgyrynyň duşuşyklaryny geçirmek hukugyna eýe bolan döwletleriň sanawyny mälim etdi. Bu barada TFF-niň resmi web saýtynda habar berilýär.
Yklym ýaryşynyň saýlama tapgyrynyň merkezleşdirilen duşuşyklary Hindistanda, Kuweýtde, Gyrgyz Respublikasynda, Malaýziýada, Mongoliýada we Özbegistanda geçiriler.
Yklym ýaryşynyň bije çekişlik dabarasynyň 24-nji fewralda geçiriljekdigini ýatladýarys. Bije çekişlik Aşgabat wagty bilen 12:00-da başlanar.
Saýlama duşuşyklaryny 8 ― 14-nji iýun aralygynda geçirmek meýilleşdirilýär.
Bije çekişligiň netijesinde toparçalaryň 6-sy emele geler. Duşuşyklary merkezleşdirilen görnüşde geçiriljek toparçalaýyn bäsleşigiň netijesinde her toparçanyň ýeňijisi bilen ikinji orunlary eýelän ýygyndylaryň 5-si Aziýanyň
Kubogynyň final böleginde çykyş etmäge mümkinçilik alar.
Bije çekişlikde ýygyndylaryň ýerleşjek sebetleriniň deslapky görnüşi:
1-nji sebet: Özbegistan, Bahreýn, Iordaniýa, Gyrgyz Respublikasy, Palestina, Hindistan;
2-nji sebet: Taýland, Täjigistan, Filippinler, Türkmenistan, Kuweýt, Gonkong;
3-nji sebet: Owganystan, Ýemen, Mýanma, Malaýziýa, Maldiwler, Indoneziýa;
4-nji sebet: Singapur, Nepal, Kamboja, Mongoliýa, Bangladeş, Şri-Lanka.
Yklym ýaryşynyň final böleginiň 2023-nji ýylyň 16-njy iýuny — 16-njy iýuly aralygynda Hytaýyň 10 şäherinde (Pekin, Týanszine, Şanhaý, Çunsin, Çendu, Sian, Dalýan, Sindao, Sýamyn, Suçjou) geçirilmegine garaşylýar.