Şu gün Türkmenistanyň Magtymguly adyndaky Ýaşlar guramasynyň Merkezi Geňeşi bilen Nesil gazetiniň redaksiýasynyň bilelikde ýaşlaryň arasynda yglan eden bäsleşikleriniň ýeňijilerini sylaglamak dabarasyndan soňra, Balkan welaýatyna amala aşyrylýan döredijilik saparyna gatnaşýan halypa ýazyjy-şahyrlar hem-de ýaş žurnalistlerdir şahyrlar Magtymguly etrabynyň Gerkez obasyna baryp gördüler.
Gerkez obasynda Magtymguly Pyragynyň adyny göterýän muzeýe gezelenç döredijilik saparyna gatnaşýanlarda aýratyn täsir galdyrdy. Bu ýerdäki gymmatlyklar, hususan-da, Magtymguly Pyragynyň dogany Zübeýda Hindistandan sowgat getiren çäýnegi hem-de Meňlä niýetlän ýüzügi hemmelerde uly gyzyklanma döretdi.
Bu ýerde ýaýbaňlandyrylan dabarada balkanly sungat ussatlarynyň ýerine ýetiren aýdym-sazly çykyşlary tomaşaçylara ruhy lezzet paýlady.
Şeýle-de bu ýerde guralan sergide görkezilen gymmatlylyklar, şol sanda ýerli ussat senetkärleriň ajaýyp eserleri çärä gatnaşýanlaryň ünsüni özüne çekdi.
Magtymguly etrabynyň Gerkez obasyndaky çäreler tamamlanandan soň, döredijilik saparyna gatnaşyjylar etrabyň taryhy ýerlerine baryp gördüler.