16-njy maýda paýtagtymyzdaky Ýyldyz myhmanhanasynda Türkmenistanyň Mejlisiniň hem-de Ýewropada Howpsuzlyk we Hyzmatdaşlyk Guramasynyň bilelikde guramagynda ÝHHG-niň çäginde howpsuzlygy, durnuklylygy we dialogy berkitmekde Bitarap döwletleriň orny ady bilen halkara maslahat geçirildi.
Oňa Türkmenistanyň Mejlisiniň agzalary, halkara guramalarynyň, Daşary işler ministrliginiň, köpçülikleýin habar beriş serişdeleriniň wekilleri hem-de ýokary okuw mekdepleriniň mugallymlarydyr talyplary gatnaşdy.
Maslahatyň dowamynda Türkmenistanyň Mejlisiniň Başlygy Dünýägözel Gulmanowa, ÝHHG-niň Parlament Assambleýasynyň ýolbaşçysy Margareta Sederfelt, ÝHHG-niň Aşgabatdaky merkeziniň ýolbaşçysy Jon MakGregor, ÝHHG PA-nyň Başlygynyň orunbasary, Merkezi Aziýa boýunça Ýörite Wekil Pia Liisa Kauma, Türkmenistanyň Mejlisiniň Başlygynyň orunbasary Gahryman Rozyýew, Mejlisiň agzasy Merdan Tuwakow dagy çykyş etdi.
Mundan başga-da BMG-niň Baş sekretarynyň syýasy meseleler boýunça kömekçisi Miroslaw Ýença wideoýüzlenme bilen çykyş etdi.
Maslahatyň meýilnamasyna Özbegistanyň, Gyrgyzystanyň we Täjigistanyň Parlamentiniň agzalarynyň, Halkara gatnaşyklary institutynyň, Halkara Ynsanperwer ylymlary we ösüş uniwersitetiniň, Şweýsariýanyň Bazel uniwersitetiniň, Halkara gatnaşyklary boýunça Awstriýa institutynyň professor-mugallymlarynyň we halkara guramalaryň birnäçesiniň synçylarynyň we wekilleriniň çykyşlary girizilipdir.
Çykyş edenler häzirki zaman dünýäsinde Bitaraplyk ýörelgesiniň eýeleýän orny, Türkmenistanyň sebitde we dünýäde abadançylygy, durnuklylygy pugtalandyrmaga gönükdirilen başlangyçlarynyň ähmiýeti dogrusynda giňişleýin gürrüň etdiler.