Türkmenistanda
1.Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy Merkezi Aziýa döwletleriniň Baştutanlarynyň Hormat nyşany bilen sylaglandy.Türkmen halkynyň Milli Lideri dostlukly ýurtlaryň Baştutanlaryna ýüzlenip, özüne bu ýokary sylagyň gowşurylandygy üçin tüýs ýürekden minnetdarlyk bildirdi.
Halk Maslahatynyň Başlygy bu ýokary sylagy türkmen halkyna çuňňur hormatyň nyşany hem-de Türkmenistanyň Merkezi Aziýa döwletleriniň arasyndaky hoşniýetli we doganlyk gatnaşyklaryny berkitmäge goşan goşandynyň ykrarnamasy hökmünde kabul edýändigini belledi.
2.Gazagystanyň, Gyrgyzystanyň, Täjigistanyň, Türkmenistanyň we Özbegistanyň Prezidentleri Merkezi Aziýa döwletleriniň Baştutanlarynyň bäşinji konsultatiw duşuşygynyň jemleri boýunça Bilelikdäki Beýannama kabul edildi.Onda taraplaryň giň gerimli hyzmatdaşlyga taýýardygy tassyklanylýar.
Mundan başga-da, sammitiň çäklerinde Merkezi Aziýada ýerüsti ulaglaryň özara baglanyşygyny pugtalandyrmak hakynda Ylalaşyga, Merkezi Aziýa döwletleriniň ulag ministrleriniň birinji duşuşygynyň Duşenbe Beýannamasyna, Merkezi Aziýa döwletleriniň arasynda ýaşlar syýasatynyň umumy ugurlary hakynda Ylalaşyga gol çekildi, şeýle hem Merkezi Aziýa döwletleriniň Baştutanlarynyň konsultatiw duşuşygynyň işleri boýunça milli utgaşdyryjy geňeşi hakynda Düzgünnama kabul edildi.
3. Şu gün Soýuz MS-24 kosmos gämisi bilen Soýuz-2.1a raketa-göteriji HKS-e uçar.Onuň bortunda Türkmenistanyň Gahrymany, Roskosmos döwlet korporasiýasynyň tälimçi-kosmonawt-synagçysy, kosmonawtlar toparynyň serkerdesi Oleg Kononenko, kosmonawt Nikolaý Çub, NASA-nyň astronawty Lorel O’Hara bardyr.
Bu waka mynasybetli Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Oleg Kononenko we öz ömrüni kosmonawtika bilen baglan ähli adamlara bütin adamzadyň ösüşine gönükdirilen gaýduwsyz zähmeti üçin tüýs ýürekden minnetdarlyk bildirdi.
4.Beýik Watançylyk urşunda gazanylan Ýeňşiň 78 ýyllygyna gabatlanyp Türkmenistanda Hatyra kitabynyň IV jildiniň gaýtadan işlenen ikinji neşiri çap edildi.Bu taryhy-dokumental işde 1941 — 1945-nji ýyllaryň urşunda faşizme garşy söweşlerde wepat bolan, şeýle hem dereksiz ýiten türkmen esgerleri hatyralanýar.
Neşir Türkmenistanyň Prezidenti Serdar Berdimuhamedowyň şanly sene mynasybetli Gutlagy bilen açylýar.Döwlet Baştutany Gutlagynda türkmen esgerleriniň doganlyk halklaryň wekilleri bilen egin-egne berip, söweş meýdanlarynda edermenligiň, batyrgaýlygyň, gahrymançylygyň belent nusgasyny görkezip, baky şöhrata mynasyp bolandyklaryny belleýär.
5.Balkan gämi gurluşyk we abatlaýyş zawody we Koreýanyň Koryo Shipbuilding Industry Technology Co., Ltd. (KSIT) kompaniýasy ýük göterijilik kuwwaty 6100 tonna bolan iki sany gury ýük gämisini bilelikde gurmak boýunça ylalaşyga gol çekdiler.
Bu taslama Türkmenistanyň Prezidentiniň ýurduň milli söwda flotuny mundan beýläk-de ösdürmek maksady bilen gol çeken Kararyna laýyklykda durmuşa geçiriler. Şertnamanyň çäginde ýokary hünär derejeli koreý inženerleri zawodyň hünärmenlerine Koreýanyň gämi gurluşyk tehnologiýalaryny öwrederler. Şeýle hem Balkan zawodynda häzirki zaman hil dolandyryş ulgamy hem ornaşdyrylar.
Taslama işleri gämi gurluşygynda kabul edilen ýokary howpsuzlyk we daşky gurşawy goramak standartlaryny göz öňünde tutup amala aşyrylar.
6. Aşgabat şäheriniň ýaşaýjylarynyň Russiýanyň iň irki teatry Döwlet akademiki Kiçi teatrynyň işgärleri bilen duşuşygy yza süýşürildi. Türkmenistanyň Medeniýet ministrliginiň habar bermegine görä, sapar tehniki sebäplere görä amala aşyrylmaz. Sapar 18 22-nji sentýabr aralygynda Saparmyrat Türkmenbaşy adyndaky Baş akademiki drama teatrynyň sahnasynda meýilleşdirilipdi. Türkmen topaşaçylaryna iki eseri Ülje bagy we Nika spektakllaryny görkezmek meýilleşdirilýärdi.
Dünýäde
7.Täjigistanyň Prezidenti Emomali Rahmon Merkezi Aziýa döwletleriniň Köpçülikleýin habar beriş serişdeleriniň assosiasiýasyny döretmegi teklip etdi.Merkezi Aziýa döwletleriniň Baştutanlarynyň bäşinji konsultatiw duşuşygynda eden çykyşynda Rahmon: Soňky ýyllarda köpçülikleýin habar beriş serişdeleri tarapyndan Merkezi Aziýa gyzyklanma artdy.
Mediýa giňişligi sebitdäki ýagdaýlar barada dürli, käwagt gapma-garşy we ýoýulan maglumatlar bilen doldurylýar.Sebitde çaklamalara däl-de, dogry faktlara esaslanýan hakyky dostlugyň we hyzmatdaşlygyň maglumat atmosferasyny döretmek üçin çäreleri görmeli diýip belledi.
8.Meksikanyň kongresinde Perudaky gadymy Kusko şäherindäki şahtadan tapylan başga planetalylaryň mumyýa edilen galyndylary görkezildi.Başga planetalylaryň galyndylaryny görkezen gözleg toparynyň başlygyolaryň diri wagtlarynda adam populýasiýasyna degişli bolmandygyny, olaryň DNK-synyň diňe 30%-ini kesgitlenendigini aýtdy.
Ozal galyndylar Meksikanyň Milli awtonom uniwersitetinde gözden geçirildi we olaryň ýaşynyň, takmynan, müň ýyla deňdigi habar berildi.Başga planetalylaryň bedenlerinde üç barmakly elleri, uzyn kelleleri we boýunlary bar, olaryň dişleri ýok, süňkleri bolsa guşlaryňky ýaly ýeňil.
Sport habarlary
9.Aşgabat şäherinde tennis boýunça Türkmenistanyň çempionaty dowam edýär.Bäsleşikler Aşgabat köpugurly sport toplumynyň tennis kortlarynda geçirilýär. Ýaryşa ýurduň dürli sebitlerinden dürli ýaş derejelerindäki türgenler gatnaşýarlar. 18 ýaşdan uly erkekleriň arasynda ýarym finala çykan tennisçiler belli boldy. Ýarym finalda Ýuriý Rogusskiý Hajymyrat Çaryýew bilen, Meýlis Orazmuhammedow bolsa Altymyrat Gurbanow bilen duşuşar.
Ilima Guseýnowa bilen Sabrina Rahmanowa bolsa zenanlaryň arasynda finala çykdy.Bürünç medal ugrunda Rožan Garajaýewa bilen Aýşa Bikbulatowa güýç synanyşar.
10.Türkmenistanyň futbol boýunça milli ýygyndysynyň Indoneziýanyň (0:2) we Bahreýniň ýygyndylary (1:1) bilen geçiren ýoldaşlyk duşuşyklarynda baş tälimçi Mergen Orazow ýaş oýunçylara özlerini görkezmekleri üçin mümkinçilik berdi we toparyň ätiýaçlykdaky oýunçylaryny gözden geçirdi.
Indoneziýanyň ýygyndysy bilen geçirilen duşuşykda Ahalyň iki futbolçysy — Alibek Abdyrahmanow we Ýazgylyç Gurbanow ilkinji gezek milli ýygyndynyň köýnekçesinde meýdana çykdy.Baş tälimçi iki futbolça hem oýnuň ikinji ýarymynda mümkinçilik berdi.
Bahreýniň ýygyndysy bilen bolan duşuşykda bolsa Energetik-BGU-nyň futbolçysy Wepa Jumaýew başlangyç düzümde meýdana çykdy.Bu onuň üçin hem Türkmenistanyň milli ýygyndysyndaky ilkinji duşuşygy boldy.
11.Täjigistanyň paýtagtynda başlanan ýüzmek boýunça halkara ýaryşda Türkmenistanyň ýüzüjileri dört medal gazandylar.Zenanlaryň arasynda erkin usulda ýüzmek boýunça 4x100 estafetasynda Waleriýa Mirenskaýa we Ogulmerjen Nuraýewa Birleşen halkara toparyň düzüminde kümüş medala eýe boldular.
Olar bilen bilelikde Gazagystandan we Täjigistandan iki ýüzüji hormat münberine çykdy. Şeýle hem Waleriýa Mirenskaýa 50 metr aralyga batterflaý usulynda ýüzmekde bürünç medala, Ogulmerjen Nuraýewa bolsa 50 metr aralyga brass usulynda ýüzmekde bürünç medala mynasyp boldy. Ýene bir bürünç medaly Gurban Hommadow 200 metr aralyga ýüzmekde gazandy.