Hytaýyň Huawei Technologies Co. kompaniýasy 2020-nji ýyldan bäri ilkinji gezek çärýek girdejisini ýokarlandyrdy. Kompaniýanyň girdejisi 2022-nji ýylyň ikinji çärýeginde 170,6 mlrd ýuan ($25,5 mlrd) boldy, bu bolsa bir ýyl ozalkydan 1,4% köpdür diýip, CNBC Huawei-niň ýarymýyllyk hasabatynyň maglumatlary boýunça hasaplady. Bu barada interfax.ru belleýär.
Birinji çärýekde kompaniýanyň girdejisi tas 14% azaldy.Görkeziji ABŞ-nyň sanksiýalary netijesinde 2020-nji ýylyň üçünji çärýeginden bäri yzygiderli peselýärdi. 2021-nji ýylda Huawei-niň ýyllyk girdejisi 28,5% azalyp, kompaniýanyň taryhynda ilkinji gezek otrisatel ösüşi görkezdi. Ýanwar iýun aýlarynda kompaniýa 301,6 mlrd ýuan möçberinde girdeji aldy, bu bolsa geçen ýyla garanyňda 5,9% azdyr.
Arassa girdeji tapawudy 5% boldy.Bulut we B2B hyzmatlary segmentinde girdeji hasabat ýarymýyllygynda 28% ýokarlanyp, 54,7 mlrd ýuana ýetdi.Telekommunikasion infrastruktura segmentinde görkeziji 4% ýokarlanyp, 142,7 mlrd ýuan boldy.
Smartfon satýan bölümçäniň girdejisi 25% azalyp, 101,2 mlrd ýuan boldy. Ýarymýyllyk netijeler kompaniýanyň çaklamalary bilen gabat geldi diýip, Huawei metbugat relizinde belledi.