Şu gün Türkmenistanyň Kärdeşler arkalaşyklarynyň Milli merkezi, Zenanlar birleşiginiň Merkezi geňeşi, Ministrler Kabinetiniň ýanyndaky Ulag we kommunikasiýalar agentliginiň Türkmenaragatnaşyk, Türkmendemirýollary, Türkmenawtoulaglary hem-de Türkmenhowaýollary agentlikleri tarapyndan Halkara zenanlar güni mynasybetli Hünärim bar — hormatym bar diýen at bilen gelin-gyzlaryň arasynda guralan bäsleşigiň jemleýji tapgyry geçirilýär.
Ak altyn myhmanhanasynyň Ak altyn restoranynda geçirilýän bäsleşige Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Türkmenaragatnaşyk, Türkmendemirýollary, Türkmenawtoulaglary hem-de Türkmenhowaýollary agentliklerinde zähmet çekýän gelin-gyzlar gatnaşýar.
Bäsleşigiň birinji tapgyry agentlikleriň hem-de degişli edara-kärhanalaryň derejesinde geçirildi. Agentlikleriň hem-de edara-kärhanalaryň bäsleşikleriniň ýeňijileri ýaryşyň ikinji tapgyrynda çykyş etmäge hukuk gazandylar.
Jemleýji tapgyr tanyşlykdan (gulluk lybaslarynda 3 minutlyk çykyş), alyp barýan wezipelerini görkezmek boýunça çeper çykyşdan, milli el işlerini ýerine ýetirmekden, türkmen zenanlarynyň milli köýneklerini gadymy biçüwde, täzeçe öwüşginde, döwrebap keşde, basma, pugtama we ş.m. el işleri bilen bezelen nusgada şöhlelendirmekden hem-de milli şaý-seplerimizde moda görkezmekden ybarat bolar.