Amerikaly işewür, milliarder Ilon Mask, ABŞ-nyň Gymmatbaha kagyzlar we biržalar boýunça Geňeşine (SEC) berlen resminamalara görä, 12-14-nji dekabr aralygynda özüniň Tesla Inc. kompaniýasynyň umumy bahasy 3,6 milliard dollara deň bolan paýnamalaryny satdy. Bu barada Kapital.kz saýty habar berýär. Şu döwürde Maskyň satan paýnamalarynyň sany 22 milliona deň boldy.
Bu işewüriň Tesladaky paýyny azaltmagy bilen bagly ilkinji ýagdaý däl. Ol noýabryň başynda hem paýnamalarynyň 19,5 millionyny satyp, 3,95 milliard dollar girdeji gazandy. Ondan öň, 2021-nji ýylyň aýagy — 2022-nji ýylyň başynda Mask kompaniýanyň paýnamalarynyň satuwyndan 31,81 milliard dollar girdeji aldy diýip, Dow Jones Market Data Group habar beripdi.