Woleýbol boýunça klublaryň arasynda geçirilen Dünýä Kubogy ýaryşlarynda erkekleriň arasynda-da, zenanlaryň arasynda-da italýan toparlary çempion boldy.Braziliýanyň Betim şäherinde geçirilen erkekleriň arasyndaky bäsleşigiň finalynda Italiýanyň “Kuçine-Lube” (Çiwitanowa) topary bilen ýer eýeleriniň wekili “Sada Kruzeiro” duşuşdy. 3:1 (25:23, 19:25, 31:29, 25:21) hasabynda ýeňiş gazanan “Kuçine-Lube” ilkinji ýola çempion bolmagy başardy. Ýaryşda 3-nji orna Russiýanyň “Zenit Kazan” topary mynasyp bolup, olar bu ugurda Kataryň “Al-Raýýan” toparyndan 3:0 (25:21, 25:18, 25:17) hasabynda üstün çykdy. 15-nji gezek geçirilen bäsleşigiň iň ökde oýunçysy diýlip, çempion toparyň braziliýaly ýyldyzy Bruno Rezende saýlandy.
Hytaýyň Şaosin şäherinde geçirilen zenanlaryň arasyndaky ýaryşda-da italýan kluby ýeňiş gazandy.Italiýanyň “Imoko Wolleý” (Koneliano) topary finalda Türkiýäniň “Ejzajybaşy WitrA” (Stambul) toparyny 3:1 (22:25, 25:14, 25:19, 25:21) hasabynda ýeňdi.
Bu ýeňiş italýan toparynyň şu ýaryşdaky ilkinji çempionlygydyr.Baýrakly 3-nji ýer ugrunda-da italýan we türk toparlary duşuşdylar. Ýöne bu oýunda Türkiýäniň “Wakyfbank” (Stambul) topary Italiýanyň “Igor Gorgonzola” (Nowara) toparyny 3:0 (26:24, 25:23, 25:21) hasaby bilen ýeňdi. Çempion toparyň ýerli ýyldyzy Paola Egonu ýaryşyň iň ökde oýunçysy diýlip saýlandy.