Pakistanda umumy saýlawlar 2024-nji ýylyň ýanwar aýynyň soňky hepdesinde geçiriler. Bu barada ýurduň Saýlaw topary (ECP) 21-nji sentýabrda habar berdi.
Maglumatlaryna görä, okruglary kesgitlemek boýunça soňky sanawlar bu ugurda bolup biljek garşylyklary we teklipleri gözden geçirilenden soň 30-njy noýabrda çap ediler.
“Dawn” gazetiniň belleýşi ýaly, saýlaw topary, 2023-nji ýyldaky soňky sanly ilat ýazuwy baradaky beýanatyndan soň, saýlaw okruglarynyň täze bölünmeginiň zerurdygyna salgylanyp, şu ýyl umumy saýlaw geçirmegi makul bilmändi.
Milli mejlis (parlamentiň aşaky palatasy) 9-njy awgustda Prezident Arif Alwi tarapyndan işden gidýän Premýer-ministr Şahbaz Şerifiň iberen habarnamasyny tassyklandan soň dargadyldy. Wezipesinden çekilýän Ministrler Kabinetiň agzalarynyň ýerine bolsa, täzesi döredilmeli.
12-nji awgustda Bulujystan welaýatyndan senatory Anwaar-ul-Hak Kakar Pakistanyň Premýer-ministri wezipesine bellendi. Ony bellemek karary Şerif bilen oppozisiýa lideri Raja Riazyň arasynda geçirilen maslahatlardan soň kabul edildi.
Mejlisiň aşaky palatasynyň bäş ýyllyk möhleti 12-nji awgustda tamamlanmalydy. Pakistanyň Konstitusiýasyna laýyklykda umumy saýlawlar aşaky palatanyň dargadylmagyndan 60 günüň içinde, möhletinden öň dargadylan halatynda – 90 günüň içinde geçirilýär.