Prezident Gurbanguly Berdimuhamedow 7-nji maýda Telewideniýe, radiogepleşikler we kinematografiýa baradaky döwlet komitetiniň başlygy Nurmämmet Garlyýewe, wezipe borçlaryny talabalaýyk ýerine ýetirmän, teleradioýaýlymlaryň işine gözegçiligi gowşadandygy üçin, berk käýinç yglan etdi hem-de ýol berlen kemçilikleri gysga wagtyň içinde düzetmek üçin, oňa soňky duýduryşyny berdi.
Şol gün Bäşim Ataýew, işde goýberen düýpli kemçilikleri üçin, Miras teleradioýaýlymynyň başlygy wezipesinden boşadyldy. Onuň wezipesi wagtlaýyn Miras teleradioýaýlymynyň baş redaktory Kuwwatberdi Hezziýewiň üstüne ýüklenildi.
Belleýäris, ýurduň prezidenti döwlet telewideniýesiniň işiniň hilinden hemişe nägilelik bildirip durýar. Mysal üçin, 2018-nji ýylyň awgustynda döwlet baştutany ýene bir gezek döwlet telewideniýesiniň gepleşikleriniň hiliniň pesdigini belledi.
2018-nji ýylyň dekabrynda Berdimuhamedow telewideniýäniň “Türkmenistandaky ägirt uly üstünlikleriň özenini we wezipelerini açyp görkezip bilmeýändigini” aýtdy.