Russiýanyň hökümediniň metbugat geňeşçisi Dmitriý Peskow, Gazagystanda ýere gaçan Azerbaýjanyň howa ýollary kärhanasy AZAL-a degişli ýolagçy uçary bilen bagly başladylan derňew işi tamamlanýança çenli, bu mesele barada beýanat bermegiň mümkin däldigini habar berdi.
Dmitriý Peskow metbugat işgärleriniň biriniň ýere gaçan uçar babatynda Azerbaýjanyň deputaty Rasim Musabekowyň Russiýanyň ötünç soramalydygy baradaky beýanaty bilen bagly soragyna jogap berdi.
Ady agzalan talapdan habarynyň bardygyny aýdan Peskow, ozal berilen beýanata goşmak isleýän zadynyň bolmandygyny belledi.
Peskow: "Bu awiasiýa hadysasy boýunça derňew işi dowam edýär we derňewiň netijeleri alynýança çenli hiç hili beýanat bermäge hakymyz ýok. Muny edip biljek awiasiýa edaralarymyz bar. Maglumat diňe olardan gelip biler" diýdi.
Azerbaýjanyň hökümet çeşmelerine esaslanýan habarlarda Gazagystanyň Aktau şäheriniň golaýynda heläkçilige uçran AZAL ýolagçy uçarynyň Russiýanyň "Pantsir-S" howa goranyş ulgamynyň hüjümine sezewar galandygy kesgitlenipdi.
Azerbaýajana degişli uçaryň Gazagystanda ýere gaçmagy bilen bagly waka:
Baku-Groznyý uçar saparyny amala aşyran AZAL-a degişli Embraer 190 kysymly uçar, 25-nji dekabrda ýere gaçypdy.
AZAL uçaryň düzüminde 5 adamdan ybarat ekipažyň we 62 ýolagçynyň, jemi 67 adamyň bolandygyny habar beripdi.
Wakada 38 adamyň ýogalandygy, 29 adamyň hem halas bolandygy mälim edilipdi.
Azerbaýjanly resmiler, uçaryň rus "Pantsir-S" howa goranyş ulgamynyň hüjümine sezewar galandygy baradaky öňe sürmeleri tassyklapdy.